VOV4.K’ho- Drim ngai 22/12, tàm ƀòn dờng Đồng Hới, cảr Quảng Bình, Ƀan Cấp hành Đảng dà lơgar, Quôk hội, Củ tịc lơgar, Cíñ phủ, Ủy ƀan Mặt trận dà lơgar Việt Nam mờ càr Quảng Bình yŭ rơyùm bơyai lơh tơngkah kir sơnrai 110 nam ngai deh Đại tướng Võ Nguyên Giáp (25/8). Thủ tướng Cíñ phủ ồng Phạm Minh Chính neh tus bal mờ đơs jơnau kah kir sơnrai. Tàm dơ̆ bơyai lơh, Thủ tướng Cíñ phủ ồng Phạm Minh Chính đơs nền, kòn bơnus, nùs nhơm mờ ală tă pơgồp dờng màng bơh Đại tướng dê gơ wèt tus mờ broă lơh kac màng Việt Nam mờ tàm dunia geh sùm geh prap wơl tàm pang kah yau pơn iờ să ngan bơh jơi bơtiàn he dê mờ kah yau srơh kac màng dunia dê.

Di dơ̆ bơyai lơh yŭ rơyùm do, ala mat kuang đơng lam bồ Đảng, dà lơgar, Thủ tướng Phạm Minh Chính sồr ală kấp, ală gah broă lơh, ală tiah mờ kơp kờñ kuang bàng, cau ling jơh gùt ling klàng tơnguh rlau tai nùs nhơm tam klac bal, pơgồp bal bơta pràn, dùl nùs bal, hòi jà bơta lơh bal bơh jơh gùt anih lơh broă cíñ trị, làng bol gùt lơgar, làng bol lơgar he tàm lơgar ndai pơn jat tai tơnguh nùs nhơm kờñ gơboh dà lơgar, nùs nhơm brồ guh is, bơta pràn tam klac dờng gùt jơi bơtiàn mờ bơta kơp kờñ brồ guh, lơh ngan sơrlèt gan kal ke, bơta lòng tềng đap mat, lơh ngan lơh jat geh cồng nha Nghị quyết pơrjum dờng dơ̆ 13 bơh Đảng dê.

Cau mblàng K’Duẩn