VOV4.K’ho- Dờp jơnau jà bơh ồng Moon Jae-in- Kuang ătbồ lơgar Hàn Quốc dê, ngai do (31/5), ồng Phạm Minh Chính- Thủ tướng Chính phủ tus bal Pơrjum Dờng màng Lơh broă bal bè Gơguh tơlir mờ Jơnau kờñ gùt plai ù nam 2030 (P4G) jăt broă lơh pờ tơlik tơn tàm internet. Pơrjum geh đơs là geh bơta kuơmàng ngan tàm tŭ tơngai tam dră mờ tam gơl trồ tiah mờ bơtàu tơnguh wơl tơlir gơ gơs là broă lơh lài khà dùl bơh ală dà lơgar dê. Do là Pơrjum Dờng màng Lơh broă bal bè Gơguh tơlir mờ Jơnau kờñ gùt plai ù dơ̆ 2.

Bal mờ bơta tus bal bơh mờr 60 nă kuang bàng đơng lam bồ, kuang bàng kấp dờng màng tus bơh uă dà lơgar, Pơrjum nam do geh tơrgùm cribơyai uă ală tơngume lơh broă bal dunia tài jơnau kờñ bơtàu tơnguh wơl tơlir tơnơ̆ tung lơtăng kòp Covid-19. Pơrjum Dờng màng Lơh broă bal bè Gơguh tơlir mờ Jơnau kờñ gùt plai ù là pơrjum cribơyai tàm hơ̆ ală lơgar tàm mpồl dong kờl priă jền, ai ală mpồl cau, mpồl lơh sa kă bro mờ mpồl lơh broă làng bol geh lơh ală rơndăp broă lơh. Jơnau kờñ là dong kờl ală lơgar gam bơtàu tơnguh gam ờ pràn jak tàm broă sơndră wơl mờ broă tơlik tuh tơlik nhơm ƀơ̆ lơh ƀơ̆ ƀơl tiah ơm kis.

Cau mblàng Lơ Mu K’Yến