VOV4.K’ho- Kung tàm mho ngai 26/10, Thủ tướng Chính phủ ồng Phạm Minh Chính tus bal mờ đơs tàm Pơrjum Kuang bàng kấp dờng màng ASEAN mờ Lo dơ̆ 24. Đơs tàm Pơrjum, Thủ tướng Chính phủ ồng Phạm Minh Chính đơs nền, mờ gùng lòt bơh 30 nam gĭt gơ̆p lơh bơyô bal, 25 nam tam klăc lơh broă bal, 18 nam tam klăc lơh broă bal jŏ jòng, ASEAN mờ Lo neh lơh gơlik geh bơnàng jă lơh broă bal tơl làm, li la mờ ngan ngồn tàm jơh ală broă.

Lơh geh bơta do là kơnòm broă lơh ngan mờ hơ pơrgon pràn kơldang bơh 2 gah dê bal mờ gơ̆p bơ̆t bơtàu bơta gĭt gơ̆p jăt tàm bơta pin dờn, gĭt wă bal mờ ki ngàm bal mờ gơ̆p, lơh broă bal geh kuơ bal. Thủ tướng jờng rơ mờ kơ̆p kờñ lơgar Lo, bal mờ bơta pràn mờ gơnoar broă mờ bơngă bơh he dê, pơn jăt tai tus bal lơh broă kơnhoàl ù tiah do mờ dunia tàm broă kơryan kòp bơtờp, gàr tiah ơm kis ring lơngai, kơ̆ kơl jăp, dong kờl bơtàu tơnguh wơl mờ bơtàu tơnguh kơ̆ kơl jăp.

Cau mblàng Lơ Mu K’Yến