VOV4.K’ho- Lài hơ̆, tàm mho ngai 28/10/2021, Thủ tướng Chính phủ ồng Phạm Minh Chính neh lam bồ mpồl kuang bàng ala măt lơgar Việt Nam tus bal pơrjum pờ tơn tàm internet Pơrjum Kuang bàng kấp dờng màng ASEAN mờ Nga dơ̆ 4 tơngkah kir sơnrai 30 nam lơh bơta gĭt gơ̆p ASEAN mờ Nga. Kuang đơng lam bồ ală lơgar ASEAN, Kuang ătbồ lơgar Nga ồng Vladimir Putin mờ Kuang ătbồ Cau gơnoar cih ASEAN tus bal pơrjum do. Ală kuang bàng đơs sùm bơta kuơmàng bơh tơngkah kir sơnrai 30 nam ASEAN mờ Nga dê, jờng rơ ală bơta gơguh jak tàm bơta gĭt gơ̆p tam klăc lơh broă bal jŏ jòng ASEAN mờ Nga mờ ring bal Broă rơndăp lơh lơh broă tơl làm tơngai bơh nam 2021- 2025.

ASEAN mờ Nga đơs nền lơh broă bal niam kơryan kòp Covid-19, pơgồp bal tàm ală broă lơh ngan tam pà vaccine ờdo ờdă, geh cồng nha mờ ndrờm bal tus làng bol tàm kơnhoàl ù tiah do in. Bàr gah dùl nùs ring bal sơlơ lơh broă bal, tìp măt cribơyai, tàm yal tơngĭt bal jơnau yal bè sơndră bơta lòng lơngăp lơngai, tă pơgồp tàm bơta ring lơngai, lơngăp lơngai mờ kơ̆ kơl jăp bơh kơnhoàl ù tiah do dê, bè Tàm lùp Kuang bàng kấp dờng màng bè ală broă lơngăp lơngai mờ Tìp măt cribơyai ASEAN mờ Nga bè ală broă lơngăp lơngai tàm măy mok yal tơngĭt jơnau. Ală lơgar dùl nùs ring bal nam 2022 là Nam Lơh broă bal Jak chài- Măy mok mờ Lơh sa mờ măy mok ASEAN mờ Nga, hơ geh pơgồp bal tơnguh bal kă bro, bơcri priă, bơtàu tơnguh wơl mờ kơ̆ kơl jăp ală anih lơh gơlik phan, sơlơ lơh broă bal đah Mpồl tam klăc bal lơh sa châu Á- châu Âu (EAEU) mờ ASEAN.

Cau mblàng Lơ Mu K’Yến