VOV4.K’ho- Drim ngai 08/01, tơnơ̆ dơ̆ bơyai lơh Dơ̆ wă rò mờ cribơyai, Thủ tướng Cíñ phủ Việt Nam ồng Phạm Minh Chính mờ Thủ tướng lơgar Lào ồng Phankham Viphavanh neh đơng lam dơ̆ pơrjum ƀăo bè cồng nha cribơyai mờ lam lơh Nam Tam klăc Lơh bơyô bal Việt Nam mờ Lào, Lào mờ Việt Nam nam 2022.

Đơs tàm dơ̆ pơrjum ƀăo bal, bàr nă Thủ tướng yal wơl ală cồng nha kwơmàng tàm dơ̆ cribơyai, bàr nă kwang bàng pà gĭt, bơta gĭt gơ̆p lơh bơyô bal pơnrơ ngan, bơta tam klăc dờng màng ngan mờ lơh broă bal tơl làm đah bàr Đảng, bàr Dà lơgar mờ làng bol bàr lơgar tàm tơngai do sùm geh lơh kơ̆ kơl jăp mờ sơlơ tơnguh tai. Thủ tướng Cíñ phủ bàr lơgar geh pơn jăt tai sồr ală ƀộ, gah, sơnah lơh broă mờ ală tiah bơh tơl lơgar dê mhar kờp sền, tă bơsong kal ke, ai geh ală gùng dà broă lơh ai lài dong kờl ai bal mờ gơ̆p in, ai tơl bơta lơh mhar lơh broă bal kă bro mờ bơcri priă, lơh jăt di tơngai, mờ lơh niam bơh ală rơndăp broă lơh lơh broă bal kwơmàng đah 2 lơgar dê.

Cau mblàng Lơ Mu K’Yến