VOV4.K’ho- Ờ mìng là cau đơng lam bồ lơh krơh niam lam lài mờ jơh nùs ngan, Thượng tá Y Miên Ktul, Phó Kuang atbồ Mpồl dong broă, Gah đơng lam ling klàng càr Dăk Lăk gam là krơh niam pơn rơ ngan tàm broă bơsram mờ lơh jat bồ tơngoh, nùs nhơm, rài kis Hồ Chí Minh dê. Ồng pa geh Bộ Tư lệnh Quân khu 5 jờng rơ cau pơn rơ jak ngan tàm broă bơsram mờ lơh jat bồ tơngoh, nùs nhơm mờ rài kis Hồ Chí Minh dê tơngai bơh nam 2016 – 2021.

Bơh tŭ kòp Covid-19 bơtờp wơl tàm Dăk Lăk, broă lơh bơh Thượng tá Y Miên Ktul ngai sơlơ ờ ru ngan. Bal mờ kơnòl tờm lơh broă tàm cơl dŭ cribơyai bal, ồng gam drơng broă đơng lam broă lơh bơh ling klàng tàm tiah ai ơm yah ngài lơh tàm Hìu bơsram Chính trị càr Dăk Lăk. Tŭ do tàm do gam dờp ai ơm yah ngài rlau 400 nă làng bol rê bơh tiah kòp. Thượng tá Y Miên Ktul sùm đơng lam tơn mờ jat sền, di tŭ pơn dờm pơn điang ală cau ling gam lơh kơnòl broă. Cau ling Phan Phạm Phúc, đơs bè cau đơng lam bồ bơh he dê bè do.

Thượng tá Y Miên Ktul– Kuang atbồ Mpồl dong broă bal là cau đơng lam bồ lơh krơh niam ngan, sùm sền gròi, rềp mềl, pơn dờm pơn điang kuang bàng, cau ling tàm ală kal ke, bòl glar tàm broă lơh nàng bol añ geh tai bơta gơn kơnờm, nùs nhơm tàm broă lơh jat kơnòl broă bơh mpồl ling dê.

Thượng tá Y Miên Ktul

Mờ gơnoar broă là Phó Kuang atbồ Mpồl dong broă, Gah đơng lam ling klàng càr Dăk Lăk, Bí thư Đảng ủy  Cơldŭ cribơyai bal, tơngai pa do, Thượng tá Y Miên Ktul neh geh uă gùng dà broă lơh dong Đảng ủy, Gah đơng lam ling klàng càr đơng lam bồ, sồr lơh, di mờ kơnòl broă ling klàng- sền gàr dà lơgar. Pơn rơ bè cribơyai bal lơh jat niam kơnòl broă rcang lài tam lơh, pơlam tàp; bơt bơtàu broă lơh chính quy, atbồ kơrnoat lơh glài ling klàng; gàr niam broă sền gròi atbồ, lơh niam rơndeh rơndồ, măy mok. Ồng kung cribơyai broă bơyai lơh pơlam tàp jat tàm mpồl ling ală kơnhoàl, ală xã ai Kuang bàng, cau ling ling klàng thường trực, mpồl ling griăp ƀòn atbồ is, mpồl ling rcang pơlam tàp mờ pơndờm pơn điang. Tàm tŭ lơh broă, Thượng tá Y Miên Ktul lơh jơh nùs ngan mờ anih lơh broă ƀòn lơgar nàng dong ală tiah in bơt bơtàu, rcang  tơl mpồl ling griăp ƀòn atbồ is; sac rơwah làng bol lòt ling lơh jat niam ngan mờ geh cồng nha.

Thượng tá Y Miên Ktul đơs, nàng broă bơsram mờ lơh jat Bác Hồ gơ gơs là broă lơh tàm rài kis pah ngai mờ tàm broă lơh, ồng neh lơh sùm tàm anih lơh broă, mpồl ling sùm bơsram “Tơl ngai dùl jơnau Bác Hồ  dê bơto”; “Pah poh dùl điều luật”; lam lơh ai ală mpồl cau, cau dùl nă să is in cih mat tus bal pơrlòng tàm broă pơlam tàp.

Lơh jat ală jơnau sồr bơh kấp hơđang dê, jat tàm bơnàng jă ală sră nggal, chỉ thị, Nghị quyết bơh kấp hơđang dê ai den să tờm añ kơlôi sơnơng mờ mblàng yal wơl ai kấp hơ đơm in dùl bă ƀuơn wă, ƀuơn kah ngan rlau jơh. Ngan là gơwèt mờ ală cau ling pa, cau ling ờ hềt geh bơta mờng chài den he pal bơto pơlam wơl nền nòn ngan nàng ală oh mi in lơh jat di. Rềp mềl, lòt sền tàm kơnă hơ đơm là bơta mờ añ bơsram geh bơh Bác Hồ dê.

Thượng  tá Y Miên Ktul sùm rềp mềl lòt sền sùm tàm kơnă hơđơm

Đơs bè broă pơrlòng bơsram mờ lơh jat krơh niam, nùs nhơm bơh Hồ Chí Minh dê bơh mpồl ling klàng Dăk Lăk dê, Thượng tá Trần Minh Trọng, Chính ủy Gah đơng lam ling klàng càr Dăk Lăk pà gĭt, tàm ală nam do, mpồl sùm lơh nền, lam lơh, lơh jat jrô ơnàng Chỉ thị sồ 05 bơh Bộ Chính trị, Chỉ thị sồ 87 bơh Thường vụ Quân ủy dà lơgar dê tus mờ jơh gùt Kuang bàng, cau ling in. Bơh bơta geh ngan bơsram mờ lơh jat krơh niam Bác Hồ dê neh geh uă broă lơh niam, broă lơh geh cồng nha mờ ală cau dùl nă să is pơn rơ jak. Mìng is să tờm Thượng tá Y Miên Ktul dê, den Chính ủy Trần Minh Trọng đơs bè do.

Mờ gơnoar broă là Phó Kuang atbồ Mpồl dong broă, Gah đơng lam ling klàng càr dê, Thượng tá Y Miên Ktul neh bal mờ mpồl cau cribơyai bal lam lơh dơ̆ lĕ bal, geh cồng nha kơnòl broă ling klàng sền gàr dà lơgar, ngan là tơnguh uă bơta niam broă lơh pơlam tàp, rcang lài tam lơh, bơtàu tơnguh tàm ală broă lơh, ală tơngume kuơ màng nàng lơh geh ală bơta tam gơl kuơ màng ngan tàm broă lơh pơlam tàp rcang lài tam lơh tàm ală anih lơh broă, mpồl ling. Ồng kung sùm gàr kơ̆ kơljap jơnau sồr tơrgùm làng bol lơh tờm pơrjum đảng, sùm là anih tờm tam klăc bal, rềp mềl mờ Kuang bàng, cau ling geh griăt tàm mpồl ling, geh tơl nă cau kờñ gơboh, pin dờn mờ kờñ gơboh.

Rềp mềl, sùm lòt lơh broă tàm kơnă hơđơm là bơta mờ Thượng tá Y Miên Ktul  neh bơsram mờ lơh jat krơh niam Bác Hồ dê. Mờ broă lơh tàm broă lơh pah ngai, ồng neh lơh jat niam nùs nhơm tam klăc bal, bơta pràn bơh mpồl cau dê nàng pơgồp bơnah bơt bơtàu anih lơh broă kơ̆ kơl jap, pràn kơl dang tơl làm “Lơh krơh niam lam lài, pơn rơ jak” gơ gơs là broă lơh sơn rờp tàm ală srơh pơrlòng bơh mpồl ling klàng Dăk Lăk dê. Să tờm Thượng tá Y Miên Ktul neh geh uă sră pơn jờng bơh UBND càr Dăk Lăk mờ Bộ Tư lệnh Quân khu 5 dê. Pa do, ồng neh geh Bộ Tư lệnh Quân khu 5 jờng rơ pơn rơ jak tàm broă bơsram mờ lơh jat bồ tơngoh, nùs nhơm mờ rài kis Hồ Chí Minh dê, tơngai bơh nam 2016 - 2021.

Cau cih H Xíu- Cau mblàng K’Hạnh