VOV4.K’ho- Mho ngai 02/6, tàm hìu lơh broă Chính phủ, đơng lam dơ̆ pơrjum pờ tơlik tơn tàm internet đah Thường trực Mpồl đơng lam dà lơgar rơcang sơndră kòp Covid-19 mờ Sở Y tế, Viện Pasteur ƀòn dờng Hồ Chí Minh, Phó Thủ tướng ồng Vũ Đức Đam, Kuang atbồ mpồl đơng lam dà lơgar sồr ƀòn dờng Hồ Chí Minh pơn jat tai xét nghiệm sền gròi kòp tàm mpồl bơtiàn, ai mẫu lơh xét nghiệm tàm ală tiah ngòt rơngơt, geh tŭ ngui rơbot hòi điện thoại is lùp còp pràn kơldang să jan nàng làng bol in yal gah lơh sơnơm, bơh hơ̆ tus tàm hìu ai mẫu xét nghiệm ală cau geh tềl tơnggŏ kòp dê halà geh jơnau pơhìn uă.

Cih dờp bơta rơcang lài tàm broă rơcang sơndră kòp bơh ƀòn dờng Hồ Chí Minh dê, Phó Thủ tướng Vũ Đức Đam sồr anih lơh broă sùm bơh Mpồl đơng lam ƀòn dờng dê pơn jat tai lơh xét nghiệm sền gròi kòp nàng gơtùi git gŏ tai ală tiah geh kòp digơlan gơlik geh tàm mpồl bơtiàn. Phó Thủ tướng Vũ Đức Đam tơngkah kuang đơng lam bồ ƀòn dờng, tŭ geh bơta kòp gơbàn uă tàm anih lơh sa mờ măi mok, broă lam lơh đal git bă tiah, tam cah is pal lam lơh nền nòn, khoa học, pleh lơh gơ tàm bơtờp kòp.

Cau mblàng K’Duẩn