VOV4.K’ho - Tàm tiah nhàr dà lơgar kơnhoàl Tuy Đức, càr Dăk Nông, ală ngai do neh geh rơlao 1 rơbô 200 nă cau rê bơh ală càr hờ đah jum dà lơgar. Gơnoar atbồ kơnhoàl pơgồp bal mờ ală mpồl lơh broă, cau dùl nă să lơh ngan dong kờl broă lơh sơnơm, phan sa, phan ngui nàng ală cau do in iang nùs lơh jăt broă tam cah ngài tơrgùm bal rơcang sơndră mờ kòp Covid-19.

Tàm tiah tam cah is tơrgùm bal geh ai lơh tàm hìu bơsram mầm non Họa My, tàm ƀòn 5, xã Quảng Tâm, bi Lương Văn Lý, cau rê bơh càr Bình Dương pà git: “Añ rê tàm ngai 3 nhai 10, jăt jơnau đơng lam bơh gah lơh sơnơm tàm do den pal tam cah is tơrgùm bal 14 ngai. Bơh tŭ rê tàm do den añ geh xét nghiệm mhar kòp Covid-19 uă dơ̆, cồng nha ndrờm ờ gŏ mờ kòp. Tiah ơm bic tiah tam cah is kloh niam, sào sa geh tơl 1 ngai 3 dơ̆, gàr niam bơta pràn kơl dang să jan. Añ gŏ gơlơh iang nùs tŭ tam cah is tàm do”.

                          Dùl tiah tam cah is tàm xã Quảng Tâm, kơnhoàl Tuy Đức, càr Dăk Nông

Ồng Nguyễn Quốc Hải, Phó Chủ tịch UBND xã Quảng Tâm pà git, xã tŭ do geh rơlao 60 nă cau rê bơh tiah gơtìp kòp ală càr hờ đah jum dà lơgar, gam pal tam cah is tơrgùm bal. Dong kờl làng bol iang nùs tàm broă tam cah is nàng rơcang sơndră mờ kòp, xã hòi jà ală mpồl lơh broă, ală cau dong kờl priă, phan sa, phan ngui, trŭ sa ờ sa priă drơng tiah tam cah is in. “Jăt mờ kơrnoăt bơh gơnoar atbồ den tă 1 ngai 80 rơbô đong priă sa 1 nă cau, ờ hềt kờp priă dà hùc, tă ală khà priă ndai. Jăt mờ kơrnoăt là bè hơ̆ mơya bol añ ờ hềt tă dùl đong lơi. Tŭ do, tàm xã bol añ gam hòi jà ală cau geh nùs nhơm niam tă priă, phan dong kờl nàng lơh “hìu trŭ sa 0 đong” ai làng bol tàm tiah tam cah is in. Làng bol ơm tàm do gam kal ke uă, bol añ lơh ngan hòi jà dong kờl nàng tam pà bal kal ke mờ rơcang sơndră mờ kòp gơtờp tàm dơ̆ do”.

   Dùl nă cau geh nùs nhơm niam xã Quảng Tâm tus dong kờl priă mờ phan sa tàm tiah tam cah is tơrgùm bal

Tàm ală nhai do, kơnhoàl tiah nhàr dà lơgar Tuy Đức, càr Dăk Nông neh rò rơlao 4 rơbô nă làng bol rê bơh ală càr gơtìp kòp Covid-19. Mìng is bơh bồ nhai 10 tus tŭ do neh geh rơlao 1 rơbô 200 nă cau rê tàm do. Gùt kơnhoàl neh dờp geh 16 nă cau geh gŏ mờ kòp Covid-19, ndrờm gŏ tàm ală tiah tam cah is tơrgùm bal, ờ geh cau lơi gơtìp tàm mpồl bơtiàn.

Ồng Nguyễn Đức Minh, Kuang atbồ hìu sơnơm kơnhoàl Tuy Đức yal, tềng đăp mờ broă làng bol rê bơh tàm tiah gơtìp kòp gơguh uă, UBND kơnhoàl neh crơng gơs 7 tiah tam cah is tơrgùm bal tàm ală xã mờ dùl tiah tam cah is tàm hìu bơsram Chính trị kơnhoàl. Tam cah is tơrgùm bal là broă lơh niam ngan nàng rơcang sơndră mờ kòp gơtờp tus tàm mpồl bơtiàn. Jăt mờ kơrnoăt den cau tam cah is tơrgùm bal pal tă priă 80 rơbô đong priă sa tàm 1 ngai. Bŭ lah bè hơ̆, kơnhoàl lơh jăt broă hòi jà gùt mpồl bơtiàn tă bal nàng bañ tă priă bơh làng bol, dong kờl làng bol iang nùs tam cah is: “Bè broă lơh den ală cau gơwèt mờ hìu rơƀah ờ tă priă, gam tai ală cau ndai den kung gam tă priă. Gơwèt mờ kơnhoàl Tuy Đức den mờr jơh ndrờm bol añ geh lam sồr, tă priă là broă lơh tờm. Broă ai rê tam cah is tàm ală xã là gùng dà broă lơh niam, geh cồng nha. Tŭ làng bol geh cèng tus tàm xã tam cah is, làng bol sùm geh nùs nhơm bè cau koèng rê tàm ƀòn lơgar, den tàng broă lam sồr tă priă nàng dong kờl geh priă trŭ sa mờ drơng tàm broă lơh den geh cồng nha ngan”.

Tàm bơta kòp gơtờp uă, bơhiàn niam bơnĕ “dong kờl bal, nha ngan dong kờl nha sèt” bơh dà lơgar Việt Nam dê neh mờ gam geh làng bol kis tàm kơnhoàl rơƀah Tuy Đức lơh geh cồng nha. Nùs nhơm tam klăc bal, tam pà bal là ding “sơnơm vaccine” geh cồng nha nàng pơgồp bal tàm broă kơrian kòp Covid-19 gơtờp.

Cau cih Tuấn Long-Cau mblàng Ndong Brawl