VOV4.K’ho- Nàng kờñ rcang lài rcang sơn dră kòp Covid-19, ngai 26/4, Mpồl lơh broă bơh Viện Vệ sinh Dịch tễ Tây Nguyên neh lòt còp mờ lơh broă mờ ală pôs đồng ling sền gàr tiah nhàr lơgar bè broă lơh rcang sơn dră kòp Covid-19 tàm ù tiah nhàr lơgar kơnhoàl Ea Sup, càr Dak Lak. Kơnhoàl Ea Sup geh pơgap 27 kơi sồ gùng tiah nhàr lơgar rềp nhàr bal mờ lơgar Campuchia, tàm do geh 4 pôs đồng ling sền gàr tiah nhàr lơgar gam lơh jat broă lơh lòt sền, sền gàr gơl gùng tiah nhàr lơgar.

Lòt sền broă lơh rcang sơn dră kòp tàm anih kơryan kòp bơh pôs đồng ling sền gàr tiah nhàr lơgar 739

Lòt còp mờ lơh broă mờ ală pôs đồng ling sền gàr tiah nhàr lơgar tàm Ea Sup, ồng Viên Chinh Chiến, Kuang atbồ Viện Vệ sinh Dịch tễ Tây Nguyên đơs niam ngan broă bơyai lơh đơng lam, sồr lam lơh jat rcang sơn dră kòp Covid-19 bơh Kuang bàng, cau ling sền gàr tiah nhàr lơgar dê.

Lòt sền broă lơh sơndră kòp tàm Pôs đồng ling sền gàr tiah nhàr lơgar Ia Rvê

Ồng đơs là, kòp Covid-19 gam gơlik geh kal ke tàm gùt lơgar, pal sền gròi ngan là đah lơgar Campuchia, dà lơgar geh gùng nhàr bal mờ lơgar Việt Nam, mpồl cau sơndră kòp tàm tiah do dê pal pơgồp bal niam ngan, tơnguh uă bơta rcang sền ngăc, nàng kờñ kơryan di tŭ ală cau mut tàm lơgar tìs mờ kơrnoat boh lam.

Cau mblàng K’ Hạnh