VOV4.K’ho- Drim òr (01/12), tàm ală càr tiah tàm gùl lơgar mìu neh rơhờt, dà tih tàm ală dà dờng gam gơhoài lơyài. Mìu sơr, dà tih neh lơh gơbam tàm uă tiah, lơh 9 nă cau gơtìp chơ̆t. Gơnoar atbồ ală tiah hòi jà mpồl lơh broă dong kờl làng bol tàm broă tơmù kal ke, lơh niam wơl gùng lòt.

Tàm kơnhoàl tiah bơnơm ñhoa Nam Trà My, càr Quảng Nam, mìu sơr mờ uă ngai do neh gơtìp uă tiah tơrlah ù dờng dềt. Mpồl lơh broă tàm tiah do bal mờ làng bol tơrgùm lơh niam ing nàng làng bol bal mờ rơndeh lòt gan. Mìu sơr dà tih tàm càr Bình Định lơh 3 nă cau gơtìp chơ̆t, 2 nă cau sồt să mờ rơlao 31 rơbô hìu làng bol gơtìp gơbam tàm dà, 1 rơbô 250 nơm iar, ơda gơtìp dà cò pơrdô. Tŭ do, gah gùng lòt càr do gam hòi jà ală mpồl tus lơh niam wơl gùng lòt nàng tơmù bơta tơrlah tàm ală gơl gùng. Mìu sơr, dà tih tàm càr Phú Yên neh lơh 6 nă cau gơtìp chơ̆t. Mìu sơr pơgồp bal mờ ală tơnao dơng dà hìu măi pờ tơlik ồs đèng yuh dà lơh rơlao 28 rơbô hìu làng bol tàm ală kơnhoàl Tuy An, Phú Hòa, Đồng Xuân mờ ƀòn dờng Tuy Hoà gơtìp gơbam dà.

Cau mblàng Ndong Brawl