VOV4.K’ho – Kờ` sền sơwì cồng nha 3 nam lơh jat Chỉ thị sồ 5 bơh Bộ Chính trị dê bè “Sơlơ chồl pràn bơsram mờ lơh jat nùs nhơm, rài kis Bác Hồ”, bơh hơ\ git kơnòl, broă lơh pơn jat tai sơlơ chồl pràn lơh jat Chỉ thị tàm nam 2019 mờ ală nam pơn jat tai, tàm [òn dờng Kon Tum, càr Kon Tum, Ban Tuyên giáo dà lơgar bơyai lơh Pơrjum tàm jàu broă lơh jat Chỉ thị sồ 05 cụm ală Tỉnh ủy, Thành ủy tiah tàm gùl lơgar – Tây Nguyên.

Sền sơwì cồng nha 3 nam lơh jat jat Chỉ thị sồ 5 bơh Bộ Chính trị dê bè “Sơlơ chồl pràn bơsram mờ lơh jat nùs nhơm, rài kis Bác Hồ”, Ban Tuyên giáo dà lơgar mờ kuang bàng ală càr tiah tàm gùl lơgar – Tây Nguyên đơs tờm, broă lơh jat Chỉ thị sồ 5 geh uă tam gơl, bơceh pa; pơgồp bal broă lam lơh kơnòl chính trị bơh [òn lơgar dê mờ broă lơh bơt bơtàu, lơh niam wơl Đảng, bơt bơtàu mpồl lơh broă chính trị mờ srơh tàm pơr lòng kờ` gơboh dà lơgar tàm tơl tiah, anih lơh broă, mpồl lơh broă. Ồng Hà Trung Ký, Kuang atbồ Ban Tuyên giáo Tỉnh ủy Dak Nông đơs tờm, càr neh sac rơwah di ală bơta ờ suk nàng tơr gùm bơsong, kờ` lơh gơs bơta tam gơl loh làng tàm broă bơsram mờ lơh jat Bác Hồ: “Gơwèt mờ càr Dak Nông bol a`, den jat bè tơl bơta geh is, tơl tiah mờ git lài bơta tam gơl pa. Bơta geh sền gròi uă tàm Dak Nông là bơta atbồ, sền gàr brê, atbồ ngui ù tiah, broă tơm priă ai ù mờ lơh glài kuang bàng đơng lam bồ ală kấp tu\ geh tềl tơnggo\ lơh tìs. Krà` cê lơh glài ală kuang đơng lam bồ tờm ngan bơh Ban Thường vụ atbồ. Pa do, Dak Nông neh lơh glài krà` ngan. Kung sơn nđàc mơya lơh jat kơrnuat Đảng dê den pal lơh”.

Gùt anih pơrjum

Ngan ngồn ai go\, Ban Thường vụ ală Tỉnh ủy, Thành ủy tiah tàm gùl lơgar – Tây Nguyên tàm broă lơh jat Chỉ thị sồ 5 neh sac rơwah geh ală bơta tam gơl pa mờ hơ pơrgon lơh jat; pơgồp bal broă sền is tìs di mờ sền tìs di mờ broă lơh jat Chỉ thị; tơnguh uă kơnòl lơh krơh bơh cau atbồ, kuang đơng lam bồ dờng màng mờ cau geh Đảng dê; sơlơ bơto bơtê lý luận chính trị; nùs nhơm, rài kis Bác Hồ; bơt bơtàu geh git nđờ rhiang broă lơh pa, broă lơh niam bơceh pa, bè broă lơh at tê bal bơt bơtàu [òn lơgar pa bơh càr Quảng Ngãi dê; broă lơh xã ring lơngai, hìu bơnhă gơboh gơbài bơh càr Quảng Bình dê; broă lơh tềm pềr jat jơnau Bác Hồ bơto sồr bơh càr Dak Lak dê… Bulah bè hơ\, bơdĩh mờ ală cồng nha lơh geh, jat uă kuang bàng, broă lơh jat Chỉ thị sồ 5 kung gam ờ uă bơta ờ niam kờ` pal geh bơsong. Mò Bùi Thị Quỳnh Vân, Ủy viên rơcang lài Đảng dà lơgar, Phó Bí thư Thường trực Tỉnh ủy, Chủ tịch HĐND càr Quảng Ngãi pà git: “Broă lơh krơh bơh ờ uă kuang bàng đơng lam bồ dê kung gam ờ hềt geh lơh jat bè jơnau sồr, jat bè broă rơndap lơh neh ai tơlik. Dơ\ 2 là đơng lam bơh ờ uă kấp ủy tàm kấp hơ đơm, kấp ủy kơnhoàl mờ xã kung ờ hềt ngan ngồn. Dơ\ 3 là kung ờ hềt geh bơta ring bal tàm broă bol he lam lơh, bơh broă bơsram tus lơh jat. Dơ\ 4 là broă cih mat lơh jat bơh ờ uă kuang bàng công chưc dê bè ală tơngume neh cih lài kung ờ hềt loh làng sơl”.

Kuang bàng geh jơnau đơs tàm pơrjum

Mò Lê Thị Kim Đơn, Kuang atbồ Ban Tuyên giáo càr Kon Tum geh jơnau đơs: “Broă mblàng yal den lơh niam ngan, mơya broă lơh uă ală broă lơh do den kung ờ hềt geh sền gròi. Dơ\ 2 là broă lơh sền s wì, sền gròi den tàm ờ uă tiah kung ờ hềt geh bơta sền gròi dipal. Càr neh lam lơh, mơya kấp hơ đơm den tàm ờ uă tiah kung gam sền ờ sơp broă do”.

Kờ` broă bơsram mờ lơh jat nùs nhơm, rài kis Bác Hồ tàm nam 2019 kung bè ală nam pơn jat tai tàm ală càr tiah tàm gùl lơgar – Tây Nguyên ngai sơlơ ngan ngồn, pơn jat tai lơh gơs bơta tam gơl pràn kơldang tàm jơnau git wă, broă lơh bơh tơl nă kuang bàng, cau geh đảng, làng bol, tàm tơl mpồl lơh broă dê, ồng Bùi Trường Giang, Phó Kuang atbồ Ban Tuyên giáo dà lơgar tơngkah: “Bol he pal sơlơ sền gàr bơnàng jă nùs nhơm bơh Đảng dê bơh broă lơh jat niam jơnau nting bơr lời wơl bơh Bác Hồ dê. Sơlơ chồl pràn rlau tai broă mblàng yal, lơh sùm, kơ\ nùs. Bơtàu tơnguh pràn ală bơta broă lơh mblàng yal. Pal sơlơ tơnguh rlau tai mblàng yal tàm mạng xã hội. Sơ lơ chồl pràn jơnau tơnggit niam tàm internet mờ dră wơl mờ ală jơnau tơnggit ờ niam. Dơ\ 2 là a` sồr bol he pơn jat tai bơsram mờ lơh jat tơngume nam 2019 dê, hơ\ là nùs nhơm sền dờng màng làng bol bơh Bác Hồ dê. Đơs pơn dut, den sền dờng màng làng bol là broă lơh kơ\ kơljap ngan rlau jơh tàm broă bơsram, lơh jat nùs nhơm Bác Hồ dê. Dơ\ 3 là bol he pal git niam ală bơta tam gơl pa”.

                Cau mblàng K’Duẩn