VOV4.K’ho - Drim òr (29/10), tàm Hà Nội geh bơyai lơh tìp bal pờ tơlik tàm internet git gơ̆p, lơh bơyô bal ơruh pơnu lơgar Việt Nam mờ lơgar Lo nam 2021. Tus bal geh ala măt kuang đơng lam Đoàn ơruh pơnu Cộng sản Hồ Chí Minh Dà lơgar, Đoàn ơruh pơnu Cộng sản lơgar Lo mờ rơlao 90 nă ơruh pơnu, cau bơsram dờng, cau lơh broă bal mờ lơgar ndai geh pơnrơ jăk bơh 2 lơgar.

Broă lơh do làng nàng tơnguh broă tìp bal, git wă bal, pơgồp bal tàm broă bơto bơtê ơruh pơnu 2 lơgar bè broă lơh git gơ̆p, lơh bơyô bal ờs mờng đah lơgar Việt Nam mờ lơgar Lo; mờ đơs geh lơh ngan, geh kơnòl mờ tơnguh gơnoar lam lài bơh ơruh pơnu bàr lơgar tàm broă pơn jăt tai, bơ̆t bơtàu nùs nhơm git gơ̆p đah bàr lơgar. Tàm broă lơh, ală kuang bàng ơruh pơnu jăk chài lơgar Việt Nam mờ lơgar Lo neh cri bơyai bal broă mờng chài bè broă Đoàn bal mờ broă ơruh pơnu, kơnòm pa tào mờ kơnòm dềt, tàm hơ̆ uă ngan là tàm broă lam lài tus bal rơcang sơndră mờ kòp Covid-19 tàm tơl lơgar; bơta git wă geh kuơ ai ơruh pơnu in tàm bơta tơrgùm bal mờ dunia tŭ do.

Cau mblàng Ndong Brawl