VOV4.K’ho- Ngai 07/4, tềng đap bơta đơng lam bơh Tổng Bí thư Nguyễn Phú Trọng, Ban Bí thư neh pơrjum sền sơ wì, lơh glài ồng Tất Thành Cang mờ ồng Lê Văn Phước. Tàm tơngai lơh Ủy viên Đảng dà lơgar, Phó Bí thư Thường trực Thành ủy Hồ Chí Minh, ồng Tất Thành Cang neh lơh tìs kơn jơ̆ ngan kơrnuat tơrgùm bal làng bol lơh tờm, kơrnuat lơh broă mờ ală jơnau cih bơh Đảng, adat boh lam bơh dà lơgar dê, lơh gơbàn hoàc huơr uă ngan tus kes priă dà lơgar, gơtìp anih lơh broă kảnh sát lùp khàu Kuang àng ƀòn dờng Hồ Chí Minh tơlik kơrnuat lah yă cau lơh tìs mờ kup jàm bè tìs “lơh tìs jơnau cih bè atbồ, ngui phan bơna dà lơgar lơh gơbàn hoàc huơr”.

Ồng Lê Văn Phước, mờ kơnòl broă Tỉnh ủy viên, Bí thư Mpồl kuang bàng duh broă Đảng, Kuang atbồ Anih cah rơña làng bol càr Phú Yên neh lơh tìs jơnau cih bơh Đảng dê bè ală bơta mờ đảng viên ờ geh lơh, lơh tìs kơrnuat atbồ priă jền, lơh gơbàn hoàc huơr kơn jơ̆ ngan mờ sa kuề sa kuà, sơ gràm ai kes priă dà lơgar neh gơtìp Anih cah rơña dờng ngan rlau jơh tàm Đà Nẵng tơlik kơrnuat lơh glài 12 nam 6 nhai kup jàm bè tìs “sa kuề sa kuà phan bơna”.

Broă lơh tìs bơh ồng Tất Thành Cang mờ ồng Lê Văn Phước dê là kơn jơ̆ ngan, lơh gơbàn jơnau pơn rơ ờ niam tàm mpồl bơtiàn, ờ suk tàm kuang bàng, đảng viên mờ làng bol, lơh gơ rềng ờ niam tus bơngă pin dờn bơh mpồl duh broă Đảng dê. Ban Bí thư tơlik kơrnuat lơh glài mờ broă tơlik Đảng gơ wèt tus mờ ồng Tất Thành Cang mờ ồng Lê Văn Phước.

Cau mblàng K’Duẩn