VOV4.K’ho- Mho ngai 08/4, Quốc hội khoá 14 neh tơn jơh pơrjum dơ̆ 11. Đơs tàm dơ̆ tơn jơh pơrjum, ồng Vương Đình Huệ Chủ tịch Quốc hội đơs loh: tơnơ̆ 12 ngai lơh broă jal mhar, jơh nùs, geh kơnòl broă uă, pơrjum dơ̆ 11, Quốc hội khoá 14 neh lơh sir jơh tơngume broă lơh geh ai mờ geh cồng nha niam bơnĕ ngan. Quốc hội neh tơn jơh uă ngan, tơl làm broă lơh tơngai lơh broă bơh nam 2016 -2021 bơh ală anih lơh broă tàm mpồl Kuang bàng dà lơgar dê, sền swì, lơh nền broă lơh Kuang bàng mờ bàr pe tơngume kuơ màng ndai. Quốc hội lời uă tŭ tơngai nàng cribơyai, sền swì ală jơnau yal broă lơh bơh Quốc hội, Chủ tịch lơgar, Chính phủ, ală anih lơh broă bơh Quốc hội, Anih Cah rơña dờng màng, Viện Kiểm sát làng bol dờng màng, Kiểm toán dà lơgar dê.

Tơn jơh pơrjum dơ̆ 11, Quốc hội khoá 14

 Kung tàm mho ngai 8/4 sơl, Quốc hội neh sền swì ring bal jơnau sồr bơh Chủ tịch lơgar dê bè măt Phó Chủ tịch lơgar mờ bàr pe nă Ủy viên Mpồl duh broă Sền gàr dà lơgar mờ bơta lơngăp lơngai bơh broă lơh đùh sră ndơ̆p, lài hơ̆ Thủ tướng Chính phủ ồng Phạm Minh Chính ăt gơnoar broă Phó Kuang ătbồ Mpồl duh broă sền gàr dà lơgar mờ bơta lơngăp lơngai. Ồng Vương Đình Huệ Chủ tịch Quốc hội, ồng Phan Văn Giang Bộ trưởng Bộ Quốc phòng, ồng Bùi Thanh Sơn Bộ trưởng Bộ Ngoại giao ăt gơnoar broă Kuang geh jơng tàm Mpồl duh broă sền gàr dà lơgar mờ bơta lơngăp lơngai. Quốc hội kung neh sền swì ring bal mờ broă lơh đùh sră ndơ̆p mat ală sồr pồ ồng Đỗ Văn Chiến Bí thư Đảng Dà lơgar, Bí thư Đảng đoàn Mặt trận dà lơgar Việt Nam mờ mò Võ Thị Ánh Xuân Ủy viên Đảng Dà lơgar, Phó Chủ tịch lơgar ai gơnoar broă Phó Kuang ătbồ Mpồl duh broă tĕ khà dà lơgar in bal mờ uă gơnoar broă Kuang geh jơng tàm Mpồl duh broă tĕ khà dà lơgar. Tơnơ̆ hơ̆, Quốc hội ring bal Kơrnoat bè broă sền swì ring bal kuang bàng pa ai bàr pe nă Phó Kuang ătbồ mờ bàr pe nă kuang bàng geh jơng tàm Mpồl duh broă tĕ khà dà lơgar.

Cau mblàng K'Hạnh mờ Lơ Mu K'Yến