VOV4.K’ho- Tơnơ̆ mờ 2 ngai lơh broă, ngai òr (14/07), pơrjum dơ̆ 58 bơh Ủy ban Thường vụ Quốc hội (TVQH) pơrjum tơn jơh. Chủ tịch Quốc hội ồng Vương Đình Huệ đơs: tus tŭ do, jơh ală tơngu me rơcang ai pơrjum dơ̆ sơnrờp, Quốc hội khoă 15 in neh lơh gơs mờ rơcang lài ai ngan sơn đờm pơrjum là ngai 20 nhai 07 tus.

Chủ tịch Quốc hội ồng Vương Đình Huệ đơs, pơrjum neh ai geh nùs nhơm ring bal, ndrờm bal uă, tàm hơ̆ uă ngan là gơwèt mờ rơndăp broă lơh 5 nam bè broă tơnguh bơtàu lơh sa mpồl bơtiàn, bè broă bơcri priă dà lơgar, bè priă jền dà lơgar, bè rơndăp broă tơm dồs dà lơgar, bơcri priă dà lơgar di mơ tơngai 5 nam bơh nam 2021 tus 2026. Kung bè ală broă lơh jăt jơnau kờñ dà lơgar bè bơ̆t bơtàu ƀòn lơgar pa mờ tơmù rơƀah kơl jăp tơngai bơh nam 2021 tus 2025.

Bè broă rơcang pơrjum dơ̆ sơnrờp Quốc hội dê, Chủ tịch Quốc hội ồng Vương Đình Huệ sồr tơnkah, ală anih lơh broă Quốc hội pơgồp bal nền nòn mờ Bộ Y tế, ală anih lơh broă geh gơnoar ƀòn dờng Hà Nội rơcang lài gùng dà broă lơh, ală broă rơcang sơndră di pal mờ bơta gơtìp bơh kòp Covid-19 nàng gàr niam ờ do ờ dă pơrjum dơ̆ sơnrờp, Quốc hội khoă 15.

Cau mblàng Ndong Brawl