VOV4.K’ho – Mho òr (26/3), tàm hìu lơh broă Quốc hội lơgar Tây, Tổng Bí thư Nguyễn Phú Trọng neh tìp mat cribơyai broă mờ Chủ tịch Quốc hội lơgar Tây, ồng Phrăng-xoa đờ Ru-gi.

Tổng Bí thư đơs niam ală tă pơgồp kuơ màng ngan bơh Nghị viện lơgar Tây dê tàm broă bơtàu tơnguh git gơp lơh bơyô, tam klac mờ lơh broă bal tơl làm đah 2 lơgar mờ làng bol 2 lơgar; đơs tờm, Việt Nam sền dờng màng git gơp lơh broă bal mờ lơgar Tây, sồr 2 lơgar lơh ngan bal mờ gơp chồl pràn tơl làm git gơp lơh broă bal Việt Nam – Tây, ngan là chul chồl pràn kơldang git gơp lơh broă bal lơh sa, kă bro, bơcri priă tus khà ndrờm mờ git gơp chính trị mờ bơta pràn bơh 2 lơgar dê.

Lài hơ\, Tổng Bí thư Nguyễn Phú Trọng neh geh dơ\ tìp mat cribơyai broă mờ Thủ tướng lơgar Tây, ồng Ê-đua-a Phi-lip. Tổng Bí thư mờ Thủ tướng lơgar Tây đơs tờm lơh broă bal lơh sa sùm geh dùl bơngă kuơ màng ngan tàm git gơp bal bơh 2 lơgar dê, ring bal lơh ngan ai git gơp lơh sa, kă bro mờ bơcri priă bơtàu tơnguh pràn kơldang rlau tai nàng di pal mờ git gơp bè chính trị, niam chài mờ bơta pràn bơh 2 lơgar dê.

Tìp mat đềt mềr ala mat cau geh bồ tơngoh bơsram sră kơnòm să lơgar Việt Nam tàm lơgar Tây, Tổng Bí thư đơs tờm Đảng, dà lơgar sùm sền dờng màng mpồl cau geh bồ tơngoh bơsram sră, sền cau geh bồ tơngoh bơsram sră Việt Nam tàm lơgar ndai là bơta pràn kuơ màng ngan bơh dà lơgar dê mờ sùm sền gròi geh ală chính sách, kơrnuat di pal nàng gơ hòi gơ jà mờ bơtàu tơnguh niam rlau tai bơta tă pơgồp bơh ală cau geh bồ tơngoh bơsram sră, cau jak chài lơgar Việt Nam dê tàm lơgar ndai gơ wèt mờ broă lơh bơtàu tơnguh bơh dà lơgar dê.

                                                    Cau cih mờ yal tơnggit K’Duẩn