VOV4.K’ho- Mho ngai 15/7, tàm Hìu lơh broă Đảng dà lơgar, ồng Nguyễn Phú Trọng- Tổng Bí thư neh geh dơ̆ cribơyai tàm điện thoại mờ Kuang atbồ lơgar Hàn Quốc ồng Moon Jae- in. Kuang atbồ lơgar Hàn Quốc ồng Moon Jae- in đơs nền sền dờng màng bơta gĭt gơ̆p mờ lơgar Việt Nam; đơs ngan Việt Nam là lơgar tờm tàm broă lơh wèt tus tiah đah Jum pa sơlơ tơnguh bơh Hàn Quốc dê; pà gĭt, Hàn Quốc geh pơn jat tai dong kờl mờ lơh broă bal niam mờ Việt Nam tàm broă lơh rcang sơndră kòp; kơ̆p kờñ sơlơ tơnguh rlau tai lơh broă bal đah 2 lơgar tàm ală gah lơh sa, lơh broă mờ lơgar ndai, sền gàr bơta lơngap lơngai, sền gàr dà lơgar... nàng gờñ ai priă lơh geh bơh kă broă đah 2 gah dê gờñ lơh geh 100 tơmàn dolar Mỹ, ai bơta gĭt gơ̆p Hàn Quốc mờ Việt Nam sơlơ bơtàu tơnguh wèt tus tơngkah 30 nam Ngai crơng gơs bơta gĭt gơ̆p lơh broă bal 2 lơgar tàm nam 2022.

Bàr Kuang đơng lam bồ ring bal pơn jat tai pờ ơnàng lơh broă bal ngan ngồn tàm ală gah, lơh pràn lơh broă bal rcang sơndră kòp mờ tac sơnơm vaccine kơryan kòp Covid-19, lơh jrô ơnàng rlau tai bơta gĭt gơ̆p đảng chính trị, Quốc hội mờ đah ală rơnàng kơnòm să 2 lơgar dê, lơh geh bơnàng jă kơ̆ kơljap ai bơta gĭt gơ̆p 2 lơgar mờ làng bol 2 lơgar Việt Nam mờ Hàn Quốc pơn jat tai bơtàu tơnguh pràn kơl dang.

Cau mblàng K’Hạnh