VOV4.K’ho - Ngai òr (24/08), tàm hìu lơh broă Đảng dà lơgar, Tổng Bí thư ồng Nguyễn Phú Trọng đơng lam dơ̆ lơh broă mờ mpồl kuang đơng lam tờm bè broă rơcang sơndră mờ kòp Covid-19. Tus bal dơ̆ lơh broă geh Chủ tịch lơgar ồng Nguyễn Xuân Phúc, Thủ tướng Chính phủ ồng Phạm Minh Chính, Chủ tịch Quốc hội ồng Vương Đình Huệ, Thường trực Ban Bí thư ồng Võ Văn Thưởng, Đại tướng Tô Lâm, Bộ trưởng Bộ kuang àng.

Tàm dơ̆ lơh broă, Tổng Bí thư ồng Nguyễn Phú Trọng neh đơs do là dơ̆ pơrjum geh kuơ tàm bơta kòp gơtờp gơtìp kal ke bè tŭ do. Tổng Bí thư pơn jờng mpồl sơnrờp lơh sơnơm, ling klàng, kuang àng, ală Bộ, gah lơh broă dà lơgar, ală càr, ƀòn dờng ha là đơs jăt jơnau ndai jơh ală gah, mpồl lơh broă chính trị neh tus bal, mờ lơh ngan tàm broă gròi sền kòp gơtờp, geh gal làng bol ring bal, kờñ bal. Bŭ lah bè hơ̆, Tổng Bí thư kung ai tơlik loh ală broă gam ờ pràn, ờ gĭt lơh, geh tŭ tàm ờ uă càr, ƀòn dờng gam geh nùs nhơm ờ sền gròi, sền ờ sơ̆p tàm broă rơcang sơndră mờ kòp gơtờp; tàm nùs nhơm rơlĕ bañ jal mhar ir, Tổng Bí thư ồng Nguyễn Phú Trọng sồr, Chính phủ, ală Bộ, gah lơh broă dà lơgar, ală càr, ƀòn dờng pơn jăt tai rơcang yal lài ală bơta gơtìp, lơh jăt ndrờm bal, tơrgùm ring bal, tam pà broă lơh ndrờm bal, di gơnoar broă, git tơl ală bơta nàng sền gròi kòp geh cồng nha tàm tơngai tus.

Cau mblàng Ndong Brawl