VOV4.K’ho - Drim òr (09/12), tàm Hà Nội, Tổng Ƀí thư ồng Nguyễn Phú Trọng đơng lam pơrjum kuang bàng gùt lơgar lơh jăt Jơnau đơs pơn dŭt mờ kơrnoăt bơh Ƀan Cấp hành Dà lơgar bè broă bơ̆t bơtàu mờ lơh niam wơl Đảng.

   Tổng Ƀí thư ồng Nguyễn Phú Trọng đơng lam pơrjum kuang bàng bè broă bơ̆t bơtàu mờ lơh niam wơl Đảng

Pơrjum geh Bộ Cĭñ trị, Ƀan Ƀí thư bơyai lơh jăt broă pơrjum tơn pơgồp bal mờ pờ tơlik tàm internet. Đơs tàm dơ̆ đơng lam pơrjum, Tổng Ƀí thư ồng Nguyễn Phú Trọng đơs loh nùs nhơm tơl jơh là bơ̆t bơtàu Đảng pal sùm lòt bal mờ broă lơh niam wơl Đảng; Đảng pal sùm kloh niam, pràn kơl dang bè cing trị, nùs nhơm mờ broă bơyai lơh. Củ tịc Hồ Cí Miñ kờñ gơboh he dê lài mờ tŭ rê mờ dunia cau niam, tàm jơnau lời wơl, Ƀác Hồ neh nting: Tơnơ̆ mờ tŭ tơnklàs geh tiah đah jum, dà lơgar tơrgùm bal den broă lơh sơnrờp ngan là pal lơh niam wơl, tơnguh wơl Đảng. Đảng geh pràn den hơ̆ sồng kăc màng geh cồng nha kung bè cau was plung pràn kơl dang hơ̆ sồng plung gơlòt niam.

Cau mblàng Ndong Brawl