VOV4.K’ho- Ngai 10/9, Tổng bí thư ồng Nguyễn Phú Trọng, Kuang atbồ Mpồl đơng lam dà lơgar bè rcang sơndră sa kuề sa kuà đơng lam pơrjum bơh Bộ Chính trị ai jơnau đơs bè Rơndap broă lơh “Tam gơl, bơtơl, gơnoar broă, kơnòl broă, gơnap gơnoar bơh Mpồl đơng lam dà lơgar bè rcang sơndră sa kuề sa kuà” nàng đơng lam rcang sơndră sa kuề sa kuà mờ bơta ờ niam tàm tơngai tus.

Tơnơ̆ tŭ iăt, kơno ala mat kuang đơng lam bồ Ban Nội chính dà lơgar- Anih lơh broă Thường trực bơh Mpồl đơng lam dê yal tơngume Sră yal bơh Rơndap broă lơh dê, Bộ Chính trị cribơyai mờ ring bal uă bè ală tơngume bơh Rơndap broă lơh dê, Tổng Bí thư ồng Nguyễn Phú Trọng đơs ngan, bơnah broă, broă tờm sồr lơh bơh Mpồl đơng lam dà lơgar rcang sơndră sa kuề sa kuà, bơta ờ niam tàm tơngai tus là đơng lam broă lơh rcang sơndră sa kuề sa kuà; rcang sơndră bơta ờ niam, broă tờm là bơta ờ niam bè bồ tơngoh chính trị, nùs nhơm, rài kis tàm Kuang bàng, đảng viên, công chức, viên chức dê, lài ngan là Kuang bàng đơng lam bồ, atbồ ală kấp bơh ală mpồl lơh broă tàm ală anih lơh broă chính trị tàm gùt lơgar.  Jat Tổng Bí thư, broă Bộ Chính trị lơh nền tam gơl, bơtơl gơnoar broă, kơnòl broă, gơnap gơnoar bơh Mpồl đơng lam dà lơgar dê bè rcang sơndră sa kuề sa kuà mờ bơta ờ niam pơn jat tai đơs nền bơta jơh nùs lơh ngan  bơh Đảng, Dà lơgar dê tàm broă tam dră mờ broă lơh rcang sơndră sa kuề sa kuà kràñ cê jơh nùs, lơh sùm, ờ ơm rlô, lơh sàng goh mpồl Kuang bàng, đảng viên, di pal mờ jơnau sồr, sồr pal geh mờ bơta pin dờn bơh làng bol dê gơwèt mờ gơnoar broă đơng lam bơh Đảng dê.

Cau mblàng K’Hạnh