VOV4.K’ho- Ngai 17/8, Tổng Bí thư ồng Nguyễn Phú Trọng neh hòi điện thoại mờ Bí thư Thành ủy ƀòn dờng Hồ Chí Minh ồng Nguyễn Văn Nên nàng cribơyai bè bơta sơndră kòp Covid-19.

Bulah ờ hềt mut tơn tàm ƀòn dờng, mơya ală ngai do să tờm Tổng Bí thư dê sùm tam pà bal, sền gròi bè bơta gơlik geh kòp tàm ƀòn dờng Hồ Chí Minh kung bè ală càr tiah đah Jum dà lơgar dê jat sền sùm pah ngai. Tổng Bí thư pơyoa jơnau lùp còp, pơn dờm pơnđiang tus mờ Đảng bộ, gơnoar atbồ mờ làng bol ƀòn dờng Hồ Chí Minh dê neh kơ̆ dơn ngan rcang sơndră mờ kòp dờng Covid-19 tàm rlau 2 nhai do.

Tổng Bí thư đơs niam ngan, jờng rơ ală krơh niam ală mpồl lơh broă tàm tiah lam lài, ờ rơngòt bơta phi să, bòl glar, kal ke nàng rcang lài mut lơh tàm dơ̆ sơndră mờ kòp, sền gàr màng kis ai làng bol in, mơkung pơyoa jơnau ưn ngài tus mờ làng bol, cau geh bồ tơngoh jak, ală mpồl cau, mpồl bơtiàn lơh sa kă bro, ală cau geh nùs nhơm niam dong kờl is... neh mờ gam tă pơgồp bal dà kơl hề bal mờ Đảng bộ, gơnoar atbồ, làng bol ƀòn dờng dê sơm bat tê bal sơndră kòp. Bơh dơ̆ tơm bơh bơr, Tổng Bí thư ồng Nguyễn Phú Trọng dùl dơ̆ tai tơngkah wơl tai ƀòn dờng Hồ Chí Minh neh lơh ngan pal sơlơ lơh ngan rlau tai, neh tam klăc bal den sơlơ tam klăc bal uă rlau tai, neh jơh nùs lơh ngan den sơlơ jơh nùs lơh ngan rlau tai.

Cau mblàng K’Hạnh