VOV4.K’ho - Drim òr (17/06), tàm hìu lơh broă Bộ Quốc phòng, Quân ủy Dà lơgar tơngai bơh nam 2020 tus 2025 bơyai lơh pơrjum dơ̆ sơnrờp tềng đăp mờ broă đơng lam bơh Tổng Bí thư ồng Nguyễn Phú Trọng, Bí thư Quân ủy Dà lơgar yal kơrnoăt bơh Bộ Chính trị yal măt ală kuang bàng tus bal Quân ủy Dà lơgar, Thường vụ Quân ủy Dà lơgar tơngai bơh nam 2020 tus 2025, sền jơnau yal cồng nha đơng lam, lam sồr lơh jăt kơnòl ling klàng sền gàr dà lơgar 6 nhai do, ai geh gùng dà kơnòl broă lơh tàm tơngai tus.

Tus bal geh Chủ tịch lơgar ồng Nguyễn Xuân Phúc, Thủ tướng Chính phủ ồng Phạm Minh Chính, Thường trực Ban Bí thư ồng Võ Văn Thưởng, Thượng tướng Phan Văn Giang, Bộ trưởng Bộ Quốc phòng, bal mờ ală kuang bàng geh jơng tàm Bộ Chính trị, Bí thư Đảng Dà lơgar, kuang đơng lam ờ uă Bộ, gah lơh broă dà lơgar.

Đơs tàm pơrjum, Tổng Bí thư ồng Nguyễn Phú Trọng sồr, Quân ủy Dà lơgar tơngai lơh broă pa pal gĭt loh làng bè kơnòl kuơ màng bơh să tờm, pơn jăt tai kơ̆ kơl jăp, dùl nùs, tam klăc bal, ring bal uă, gàr bè ờs kơrnoăt, geh broă đơng lam khoa học, lơh tờm, bơ̆t bơtàu ling klàng đềt mềr mờ Dà lơgar, mờ Đảng, Dà lơgar bal mờ làng bol, tàm hơ̆ uă ngan, bơ̆t bơtàu Đảng bộ ling klàng kloh niam pràn kơl dang, lam lài geh pơnrơ mờ đơng lam gùt ling klàng lơh geh cồng nha ală kơnòl geh jào nàng pơn jăt tai lơh niam tai rùp rài cau ling wa Hồ dê.

Cau mblàng Ndong Brawl