VOV4.K’ho - Geh jơnau yal bè bơta kòp Covid-19 tàm lơgar Campuchia gơbàn uă, Tổng Bí thư Ban Chấp hành Đảng dà lơgar he ồng Nguyễn Phú Trọng neh geh dơ̆ hòi điện thoại còp să tus mờ ồng Samdech Techo Hunsen, Chủ tịch Đảng Làng bol lơgar Campuchia, Thủ tướng Chính phủ lơgar Campuchia.

Ala măt Đảng, Dà lơgar, làng bol lơgar Việt Nam, Tổng Bí thư ồng Nguyễn Phú Trọng pơyoa jơnau tus mờ ồng Samdech Techo Hunsen bal mờ ală kuang bàng đơng lam Đảng Làng bol lơgar Campuchia, Dà lơgar bal mờ làng bol lơgar Campuchia ală nùs nhơm oh mi đềt mềr mờ jơnau còp să jơh nùs ngan bè ală hoàc huơr bơh kòp Covid-19 lơh gơbàn tàm lơgar Campuchia.

Mờ bơhiàn tam klăc bal, đềt mềr bal, dong kờl bal bơh bàr Đảng, bàr Dà lơgar bal mờ làng bol bàr lơgar, lơgar Việt Nam sùm rơcang lơh broă bal, dong kờl bal, tam pà bal broă mờng chài tàm bơta geh mờ bơta ai nàng bal mờ lơgar Campuchia tàm broă tam dră mờ kòp Covid-19, nàng bàr lơgar he gờñ ring niam bơta kòp.

Cau mblàng Ndong Brawl