VOV4.K’ho- Lơh jăt Broă lơh tìp măt mờ cau tĕ khà tơnơ̆ pơrjum dơ̆ 2, Quốc hội khoă XV, drim ngai 26/11, Tổng Ƀí thư ồng Nguyễn Phú Trọng bal mờ ală kuang bàng Quốc hội gơwèt Mpồl tĕ khà sồ 1, Mpồl kuang bàng Quốc hội ƀòn dờng Hà Nội neh geh dơ̆ tìp măt mờ cau tĕ khà tàm ală quận: Ƀa Đình, Đống Đa mờ Hai Ƀà Trưng jăt broă lơh tìp măt tơn pơgồp bal mờ tìp măt pờ tơlik bơh tàm internet tus tàm 56 sơnah ƀòn bơh 3 quận dê bal mờ 1 rbô 255 nă cau tĕ khà, nàng kờñ yal cồng nha pơrjum dơ̆ 2 mờ hơ ală jơnau lùp, jơnau dan bơh cau tĕ khà dê.

Uă ngan cau tĕ khà đơs, pơrjum dơ̆ 2, Quốc hội khoă XV geh lơh tàm bơta krơi is ngan, ală kuang bàng Quốc hội lơh broă bal mờ nùs nhơm geh kơnòl uă mờ lơh geh bơta ring bal uă. Ngan là bè ală tam gơl pa, lơh gơguh jak tàm broă lơh bơh Quốc hội dê. Gơwèt mờ broă rơcăng sơndră kòp Covid-19, cau tĕ khà sồr Quốc hội, Chính phủ, ală ƀan, ƀộ, gah sơnah lơh broă sơlơ bơcri tai priă jền ai gah lơh sơnơm kơnă hơđơm in, broă lơh lơh sơnơm rơcăng gàr lài; lơh mờ ring bal bơnàng jă măy mok ngui bal tàm jơh gùt lơgar tàm broă lơh rơcăng sơndră kòp Covid-19.

Jăt Tổng Ƀí thư ồng Nguyễn Phú Trọng đơs, nàng ală Kơrnoăt bơh Quốc hội dê lòt mŭt tàm rài kis, ală anih lơh broă tàm mpồl kuang bàng dà lơgar pal sơrbac mhar lam lơh jăt niam ală adat, kơrnoăt pa geh ring bal; pơn jăt tai tam gơl pa, tơnguh uă bơta niam, cồng nha lơh broă, sền gròi broă lơh jăt sền, sền swì, tă pơgồp jơnau đơs nàng ngui niam ală bơta niam mờ bơsong ală bơta ờ suk, ờ hềt pràn jak.

Cau mblàng Lơ Mu K’Yến