VOV4.K’ho- Lơh jat Broă lơh tìp mat mờ cau tĕ khà lài mờ dơ̆ Pơrjum dơ̆ 2, Quốc hội khoá 15, Tổng Bí thư ồng Nguyễn Phú Trọng neh tìp mat mờ cau tĕ khà ală quận Ba Đình, Đống Đa, Hai Bà Trưng (Hà Nội) nàng yal jơnau rơcang lài broă lơh pơrjum iăt, kơno mờ hơ ală jơnau đơs, jơnau dan bơh cau tĕ khà dê. Uă ngan cau tĕ khà tơngŏ bơta chờ hờp bè jai pha mờ cồng nha kuơ màng tàm Pơrjum dà lơgar dơ̆ 4 pa tơn jơh, tơngŏ dùl nùs bal mờ gùng dà broă lơh bơh Đảng, Dà lơgar dê bè broă lơh kuang bàng kấp jŏ jòng geh đơs tàm jơnau đơs tơn jơh pơrjum bơh Tổng Bí thư ồng Nguyễn Phú Trọng dê.

Tổng Bí thư ồng Nguyễn Phú Trọng wă cau tĕ khà tàm ƀòn dờng Hà Nội

Đơs tàm dơ̆ tìp mat mờ cau tĕ khà, ồng Nguyễn Phú Trọng đơs là, kòp dờng Covid-19 gơrềng dờng ngan tus mờ dunia đơs bal, tàm hơ̆ geh lơgar he. Tus tŭ do, tơl broă lơh bơh dà lơgar dê kung gam geh bè ờs sơl tàm bơta rcang sơndră kòp. Ồng Nguyễn Phú Trọng kơ̆p kờñ tàm tơngai tus, jơh bal anih lơh broă chính trị mờ làng bol pơn jat tai lơh jat niam nùs nhơm tam klăc bal, dùl nùs nhơm bal, lơh ngan jơh nùs uă nàng sơr lèt gan bơta kal ke, ngan là bañ sền ờ sơ̆p mờ ờ rcang sền ngăc, pơn hừ să tềng đap kòp Covid-19. Ồng Nguyễn Phú Trọng sồr, tơl nă Kuang bàng Quốc hội pal ngan ngồn là kuang bàng jơh nùs, dòn song, dùl nùs bal, sùm lơh ngan lơh jat niam kơnòl broă geh jàu.

Cau mblàng K’Hạnh