VOV4.K’ho- Drim ngai 05/01, tàm hìu lơh broă Cíñ phủ, tềng đap bơta đơng lam bơh Thủ tướng Phạm Minh Chính dê, Cíñ phủ bơyai lơh pơrjum pờ tơlik tơn tàm internet gùt lơgar lam lơh jat jơnau đơs pơn dut bơh Đảng dà lơgar mờ Nghị quyết bơh Quôk hội khóa 15 dê bè broă rơndap lơh bơtàu tơnguh lơh sa- mpồl bơtiàn nam 2022.

Tus bal mờ đơs đơng lam tàm pơrjum, Tổng Ƀí thư ồng Nguyễn Phú Trọng đơs loh, tơngai tus, Cíñ phủ pal tơrgùm lam lơh geh cồng nha broă lơh bơtàu tơnguh wơl mờ bơtàu tơnguh lơh sa- mpồl bơtiàn, gơ jat bal mờ broă lam lơh ring bal jơnau kờñ gròi sền bơta roh bơngă khà priă, gàr kơ̆ kơljap broă lơh sa dờng mờ bơta ring bal dờng ngan bơh rài lơh sa dê. Pơn jat tai tam gơl broă bơcri priă kă bro, chồl pràn gơguh lơh sa mhar mờ kơ̆ kơljap, ngan ngồn rlau.

Thủ tướng Cíñ phủ ồng Phạm Minh Chính đơs nền, pơrjum do geh mblàng lơh loh, sền sơ wì cồng nha lam lơh kơnòl broă cíñ trị nam 2021, đơs nền ală bơta niam mờ song dơpă đơs tus ală bơta ờ niam, jơnau bơh tài gơlik geh, ngan là jơnau gơtùi git lài. Mờ kung ai tơlik ală broă lơh bơsong, cribơyai nền nòn mờ ring bal bè jơnau kờñ, kơnòl broă, broă lơh tờm ngan nàng lam lơh kơnòl broă cíñ trị kuơmàng geh Đảng, dà lơgar mờ làng bol jàu.

Cau mblàng K’Duẩn