VOV4.K’ho- Ngai 11/8, tàm Hìu lơh broă Chính phủ geh lơh pơrjum pờ tơn tàm internet gùt lơgar dơ̆ sơn rờp bơh Chính phủ dê tơngai lơh broă bơh nam 2021 tus nam 2026 lam lơh jat Nghị quyết Pơrjum dờng Đảng gùt lơgar dơ̆ 13 mờ nghị quyết bơh Quốc hội khóa 15 dê bè bơtàu tơnguh lơh sa- mpồl bơtiàn 5 nam, tơngai bơh nam 2021 tus nam 2025. Tổng Bí thư ồng Nguyễn Phú Trọng tus bal mờ đơs đơng lam tàm dơ̆ pơrjum.

Tổng Bí thư ồng Nguyễn Phú Trọng đơs loh, Pơrjum gùt lơgar dơ̆ 13 bơh Đảng dê neh lơh geh cồng nha niam bơnĕ, ring bal ai tơlik broă rơndap lơh bơt bơtàu, bơtàu tơnguh mờ sền gàr dà lơgar, tàm hơ̆ geh broă rơndap lơh bơtàu tơnguh lơh sa- mpồl bơtiàn 10 nam bơh nam 2021 tus nam 2030, broă wèt sền tus nam 2045, lam lơgar he gơ gơs là lơgar bơtàu tơnguh geh priă jền lơh geh uă mờ gùng dà, kơnòl broă bơtàu tơnguh lơh sa- mpồl bơtiàn 5 nam bơh nam 2021 tus nam 2025.

Nàng lơh gơs geh cồng nha ală jơnau kờñ, kơnòl broă neh ai tơlik, Tổng Bí thư ồng Nguyễn Phú Trọng sồr, Chính phủ tơngai lơh broă bơh nam 2021 tus nam 2026 pal pơn jat tai tơnguh pràn rlau tai, niam rlau tai bơhiàn pơn iờ să, ală cồng nha dờng màng mờ ală jơnau bơsram mờng chài kuơmàng mờ Chính phủ bơh ală tŭ tơngai neh lơh geh; lơh ngan rlau tai tàm gơl gùng tam gơl pa, tơnguh bơta niam, cồng nha lơh broă tàm tơngai bơtàu tơnguh pa.

Cau mblàng K’Duẩn