VOV4.K’ho- Drim ngai 15/9 tàm Hà Nội, Ban Nội chính dà lơgar bơyai lơh pơrjum gùt lơgar ală anih lơh broă Nội chính lam lơh jat Nghị quyết pơrjum dờng dơ̆ 13 bơh Đảng dê. Tổng Bí thư ồng Nguyễn Phú Trọng neh tus bal mờ đơs đơng lam tàm pơrjum.

Đơs đơng lam tàm pơrjum, Tổng Bí thư ồng Nguyễn Phú Trọng đơs loh, dùl dà lơgar, dùl mpồl bơtiàn kờñ niam bơnĕ den bơdìh mờ bơta bơto bơtê, bơta nting tơngkah, pal geh kơrnuat, pal geh adat boh lam nàng sền gàr bơta niam, bơta di; pơhìn, lơh glài ală bơta ờ niam, bơta tìs, lơh aniai tus làng bol, tus dà lơgar, hơ̆ là pal geh bơta atbồ mờ cơ chế, adat boh lam, pal geh kơrnuat boh lam dà lơgar, mờ kờñ bè hơ̆ den pal geh ală anih lơh broă Nội chính.

Bơh nùs nhơm do, Tổng Bí thư ồng Nguyễn Phú Trọng sồr, ală anih lơh broă Nội chính pal gàr bơta đơng lam, pơlam jơh nùs, tơl làm bơh Đảng dê gơ wèt tus mờ ală anih lơh broă Nội chính đơs bal, gàr kơ̆ mờ sơlơ tơnguh bơta đơng lam bồ jơh ală bơta, đơng lam tơn bè tơl gah bơh Đảng dê gơ wèt tus mờ mpồl lơh broă geh phàu crong đơs bal. Do là bơta kuơmàng, là bơta lơh nền gàr lơh geh jai pha tơl kơnòl broă geh jàu.

Cau mblàng K’Duẩn