VOV4.K’ho- Drim òr (20/07), Tổng Bí thư ồng Nguyễn Phú Trọng bal mờ ală kuang bàng đơng lam Đảng, Dà lơgar tus sơn đờm pơrjum dơ̆ sơnrờp, Quốc hội khoă 15 geh bơyai lơh tàm hìu pơrjum Diên Hồng tàm càr lơgar Hà Nội.

                      Tổng Bí thư ồng Nguyễn Phú Trọng geh jơnau đơs tàm dơ̆ sơn đờm pơrjum

Đơs tàm pơrjum, Tổng Bí thư ồng Nguyễn Phú Trọng sồr, Quốc hội pal pơn jăt tai tơnguh pràn rơlao tai gơnoar, bơngă bơh Quốc hội dê tàm broă lơh gơs adăt boh lam ai ală broă lơh dà lơgar in, drơng kơnòl tơnguh bơtàu lơh sa mpồl bơtiàn, gàr niam bơta lơngăp lơngai dà lơgar, lơh broă bal mờ lơgar bơdìh. Chồl mhar broă lơh mờ tơnguh uă bơta niam tơlĭk ală sră nggal adăt boh lam; gờñ bơ̆t bơtàu broă lơh adăt boh lam tơl, ndrờm bal, gàr bơta niam, di pal mờ jơnau kờñ mùl màl.

Là anih lơh broă ala măt dờng ngan rơlao jơh làng bol dê, anih lơh broă geh gơnoar dà lơgar uă ngan bơh lơgar Cộng hoà xã hội chủ nghĩa Việt Nam, Tổng Bí thư sồr Quốc hội pal tơnguh ală cồng nha mờ broă lơh mờng chài bơh 75 nam do, pơn jăt tai tam gơl pa, tơnguh uă rơlao tai bơta niam mờ cồng nha lơh broă nàng di pal niam ngan jơnau kờñ, kơnòl chính trị bơh dà lơgar dê tàm tơngai pa.

Cau mblàng Ndong Brawl