VOV4.K’ho - Drim òr (16/12), tàm Hà Nội, Quân ủy Dà lơgar bơyai lơh pơrjum dơ̆ 3, tơngai lơh broă bơh nam 2020 tus 2025 ring bal tàm jơnau yal tơn jơh broă lơh ling klàng, sền gàr dà lơgar nam 2021, ai gùng dà broă đơng lam lơh jăt kơnòl ling klàng, sền gàr dà lơgar mờ bơ̆t bơtàu Đảng ƀộ ling klàng nam 2022.

Tổng Ƀí thư ồng Nguyễn Phú Trọng, Ƀí thư Quân ủy Dà lơgar đơng lam pơrjum. Đơs tàm dơ̆ sơn đờm pơrjum, Tổng Ƀí thư ồng Nguyễn Phú Trọng kơ̆p kờñ, ală kuang bàng tơrgùm kơlôi sơnơng, pơgồp bal jơnau đơs tàm dơ̆ cri bơyai, sền sơwì tàm jơnau yal tơn jơh broă lơh ling klàng, sền gàr dà lơgar nam 2021, mờ ring bal ai gùng dà broă đơng lam lơh jăt kơnòl ling klàng, sền gàr dà lơgar mờ bơ̆t bơtàu Đảng ƀộ ling klàng nam 2022 bal mờ jơh gùt tơngai lơh broă. Mho dùl ngai bal, Đại tướng Phan Văn Giang, Ƀộ trưởng Ƀộ Quốk phòng đơng lam Pơrjum Quân ủy Dà lơgar ring bal: Rơndăp broă Nghị quyết bơh Quân ủy Dà lơgar bè “Tơnguh nùs nhơm niam “Cau ling Wa Hồ”; Jơnau yal tơn jơh broă lơh jăt Nghị quyết bơh Quân ủy Dà lơgar bè “Đơng lam kơnòl lơh sa, bơ̆t bơtàu lơh sa pơgồp bal mờ sền gàr dà lơgar bơh Ling klàng dê tus nam 2020”...

Cau mblàng Ndong Brawl