VOV4.K’ho - Drim òr (22/10), tàm ƀòn dờng Hải Phòng, Quân ủy Dà lơgar, Bộ Quốc phòng bơyai lơh tơnkah 60 nam ngai pờ gùng Hồ Chí Minh tàm dà lềng (23/10/1961 -  23/10/2021).

Tổng Bí thư ồng Nguyễn Phú Trọng tus bal pơrjum. Tàm dơ̆ tam lơh mờ ling lơgar Mỹ sò tơm tơnklàs dà lơgar, tềng đăp mờ bơta kờñ jal mhar, di tŭ dong kờl ai tiah tam lơh hờ đah jum dà lơgar in, ngai 19 nhai 5 nam 1959, Tổng Quân ủy mờ Bộ Quốc phòng tơlik kơrnoăt crơng gơs Mpồl kuang bàng lơh broă kuơ màng” (tơnơ̆ mờ hơ̆ tam gơl măt sơnđan là Mpồl 559), geh kơnòl pờ gùng pơn diang phan, bơyai lơh jun, rò cau ling, kuang bàng bơh tiah đah tô mŭt tàm tiah đah jum mờ bơh tiah đah jum lik tus tiah đah tô.

Tơnơ̆ mờ tŭ neh kơlôi sơnơng nền nòn, lơh tơrlòng mờ rơcang tơl ală bơta, ngai 23 nhai 10 nam 1961, Bộ Quốc phòng neh tơlik kơrnoăt crơng gơs Mpồl 759 pơn diang ling klàng tàm gùng dà lềng. Broă geh crơng gơs bơh Mpồl 759 bal mờ broă pờ geh gùng dong kờl jŏ jòng đah tô-đah jum tàm dà lềng là broă lơh geh ai tơngŏ pờ gùng pơn diang phan jŏ jòng tàm dà lềng mìng dong kờl ai tiah đah jum in geh măt sơnđan Chủ tịch Hồ Chí Minh. Nam nhai lòt gan, mơya gùng Hồ Chí Minh tàm dà lềng sùm là bơta pơnyờ să bơh ling klàng bal mờ làng bol lơgar Việt Nam dê, là rùp rài àng gơcrà bơh nùs nhơm khin cha jăk chài kăc màng, bơh bồ tơngoh ngăc ngar, khin cha, kră kơl dang, lơh ngan nàng geh lơngăp lơngai, khăt gơboh, dà lơgar tơrgùm bal.

Cau mblàng Ndong Brawl