VOV4.K’ho- Drim ngai 07/12, tàm hìu lơh broă Đảng dà lơgar, Tổng Bí thư ồng Nguyễn Phú Trọng neh wă ồng Say-xổm-phon Phôm-vi-hản mờ mpồl kuang bàng dờng màng Quốc hội Lào. Chủ tịch Quốc hội Lào yal mờ Tổng Bí thư ồng Nguyễn Phú Trọng in bè broă tàm lơgar Lào tàm tơngai rềp ndo, ngan là broă lam lơh jat Nghị quyết pơrjum dờng dơ̆ 11 bơh Đảng dê, bè cồng nha dơ̆ tìp mat cribơyai broă mờ Chủ tịch Quốc hội ồng Vương Đình Huệ mờ Pơrjum cribơyai mờng chài đah 2 Quốc hội. Chủ tịch lơgar Lào đơs nền, Quốc hội Lào geh pơgồp bal jơh nùs mờ Quốc hội Việt Nam lam lơh geh cồng nha ală Jơnau ring bal đah Kuang đơng lam bồ dờng màng 2 Đảng, 2 dà lơgar mờ Jơnau ring bal lơh broă bal đah 2 Quốc hội.

Tổng Bí thư ồng Nguyễn Phú Trọng đơs nền, Việt Nam kờñ uă ngan mờ tơl làm broă lơh tam gơl pa bơh lơgar Lào dê mờ pin dờn là, mờ bơhiàn kah yau kac màng, tềng đap bơta đơng lam bơh Đảng Nhân dân kac màng Lào dê, bơta đơng lam bơh Chính phủ dê, bơta gròi sền bơh Quốc hội dê, làng bol lơgar Lào geh pơn jat tai lơh geh cồng nha pa, dờng rlau tai tàm broă lơh tam gơl pa, lam lơh jat geh cồng nha Nghị quyết pơrjum dờng dơ̆ 11 bơh Đảng dê.

Cau mblàng K’Duẩn