VOV4.K’ho- Drim ngai 28/4, tàm Hà Nội, Tổng Liên đoàn Lao động Việt Nam yŭ rơyùm bơyai lơh tơngkah 135 nam Ngai dunia lơh broă (01/5/1886 – 01/5/2021), lam lơh Nhai công nhân. Đơs tàm dơ̆ bơyai lơh, Chủ tịch lơgar ồng Nguyễn Xuân Phúc đơs loh, Dà lơgar mờ làng bol he sùm lời ai bơta sền gròi kuơmàng ngan tus rơnàng công nhân, cau lơh broă mờ mpồl lơh broă công đoàn.

Chủ tịch lơgar jờng rơ ală kấp công đoàn neh lơh jat nền nòn jơnau đơng lam bơh Ban Bí thư dê sùm lơh ngan, bơceh pa lam lơh ală broă lơh geh kuơ nàng mờr 10 nam do Nhai công nhân ngan ngồn gơ gơs là ngai chờ bơh công nhân, viên chức, cau lơh broă gùt lơgar dê. Bơh nùs nhơm hơ̆, Chủ tịch lơgar sồr Mpồl lơh broă công đoàn pal mhar bơt bơtàu broă rơndap lơh bơh Công đoàn Việt Nam dê lam lơh jat Nghị quyết pơrjum dờng dơ̆ 13 bơh Đảng dê gàr khoa học, ngan ngồn, geh cồng nha.

Tàm dơ̆ bơyai lơh, ala mat Mpồl đơng lam Nhai lơh broă bè ờdo ờdă, kloh niam lơh broă dà lơgar, Bộ trưởng Bộ Lao động, Thương binh mờ Xã hội ồng Đào Ngọc Dung lam lơh Nhai lơh broă bè ờdo ờdă, kloh niam lơh broă nam 2021 mờ tơngume “Sơlơ sền sơwì, sền gròi ală jơnau pơhìn, bơta aniai bè ờdo ờdă, kloh niam lơh broă mờ tus bal bơh cau lơh broă gàr ờdo ờdă, kloh niam dê”.

Cau mblàng K’Duẩn