VOV4.K’ho - Tơngai ơm rơlô ngai Sơn tờm dà lơgar ngai 2 nhai 9 tàm 4 ngai, ƀuơn ngan gơguh ală bơta di gơlan gơtờp kòp, ai wơl bơsram wơl jơnau bơsram bơh dơ̆ ơm rơlô ngai 30 nhai 4 là do, Thủ tướng Chính phủ neh geh jơnau sồr Chủ tịch UBND ală càr, ƀòn dờng tàm gùt lơgar tơnguh nùs nhơm geh kơnòl mờ jơnau kờñ jơh ală tài bơta pràn kơl dang să jan, màng kis làng bol; pơn jăt tai tơrgùm đơng lam, lam sồr mờ tơnguh broă bơyai lơh jăt nền nòn, geh cồng nha uă ală broă rơcang sơndră mờ kòp tàm ƀòn lơgar.

Kuơ màng, gơwèt mờ ală ƀòn lơgar gam tàm tơngai lơh jăt broă tam cah ngài mpồl bơtiàn, pal tơnguh broă lơh jăt nền nòn, ngan ngồn broă tam cah ngài mpồl bơtiàn pal lơh jăt nùs nhơm “cau tàm tiah lơi ơm tàm tiah hơ̆”; bañ lời gơtìp geh tơrgùm gal cau, bañ lời gơtìp làng bol ntrờn, lik tàm gùng lơh gơguh tàm dơ̆ ơm rơlô ngai sơn tờm dà lơgar ngai 2 nhai 9; lơh glài nền nòn di jăt mờ adăt boh lam ală cau lơi tìs mờ kơrnoăt geh ai bè broă rơcang sơndră mờ kòp gơtờp. Bơyai lơh niam broă gàr niam rài kis broă lơh sa mpồl bơtiàn, bơta lơngăp lơngai, ờ do ờ dă tàm mpồl bơtiàn nàng làng bol lơh is, iang nùs tus bal dong kờl broă rơcang sơndră mờ kòp gơtờp. Bañ lời gơtìp ờ tus broă jào phan sa, gàr niam broă lơh sơnơm bơh gờñ, bơh ngài, bơh tàm ƀòn lơgar tàm tơngai ơm rơlô mờ lơh jăt broă sền gròi mpồl bơtiàn.

Cau mblàng Ndong Brawl