Ngai lơi kung bè hơ̆, mpồl kuang bàng, cau lơh broă Công ty TNHH MTV lâm nghiệp Kon Rẫy, lơh broă tàm Anih atbồ sền gàr brê Đăk Kôi 1, gơwèt xã Đăk Kôi, kơnhoàl Kon Rẫy kung mŭt tàm brê lơh jăt kơnòl atbồ, sền gàr bă brê geh jào.

                                                           Ngui flycam nàng atbồ, sền gàr brê

Di lah bè lài do nàng sền gròi geh dùl dòr bơnơm, tiah thòng nàng sền geh cau blơ̆ mus kơl kơñao chi, ha là làng bol mus, chu brê nàng lơh mìr ha là mìng geh dùl broă lơh là lòt jơng, di lah ờ jŏ den 2, 3 jơ, di lah jŏ den tus nggùl ngai hơ̆ sồng tus tàm tiah gơtìp. Tŭ do den neh is, kơnờm mờ broă geh flycam, mpồl lòt sền gròi mìng rơwah bă tiah buơn hơ̆ sồng tơnpar phan par wèt tus hờ tiah kờñ sền gròi. Bi Trần Văn Tiệp pà git: “Tŭ do neh geh broă lơh drơng ala tiah kis brê lài ngan là bè phan ai he in, phan soh ală bơta Công ty drơng gàr tus mờ rài kis ală oh mi in niam ngan. Tŭ do, geh phan lơh broă bè flycam dong kờl uă ngan tus mờ broă lơh. Lài ngan bè broă gŏ mìr. Lài do tàm brê tiah ngài, he lòt di gơlan ờ gơtùi tus, tŭ do par dùr dar den tus jơh tàm hơ̆, he sòl gŏ jơh, gŏ ală bơta tơngŏ lơi hơ̆ den he gŏ di tŭ nàng kơrian tơn”.

Bơh nam 2011 rê hờ lài, tŭ ờ hềt geh broă tơm priă sền gàr tiah kis brê, ngan là tŭ Công ty TNHH MTV lâm nghiệp Kon Rẫy ờ gam lơh jăt broă kơl chi tai, rài kis bơh cau lơh broă gơtìp kal ke ngan. Bal mờ hơ̆, khà priă ai bơh broă atbồ sền gàr brê pah nam ờ uă ngan. Do là bơta tờm lơh brê sùm gơtìp ồs sa tàm kàl prang mờ gơtìp cau blơ̆ kơl gùt nam.

                                              Lam sồr bè broă tơm priă sền gàr tiah kis brê

Ồng Nguyễn Văn Quý, Phó Kuang atbồ Công ty TNHH MTV lâm nghiệp Kon Rẫy pà git, broă tơm priă sền gàr tiah kis brê neh dờp tai bơta pràn ai cau lơh broă mờ brê in mờ khồm geh nhơm pa tàm ală bă brê: “Bơh nam 2011 tus nam 2020, tơl nam Công ty geh bơh broă lơh drơng ala tiah kis brê di pơgăp rơlao 13 tơmàn đong. Bơh khà priă geh do Công ty neh bơyai jào sền gàr brê ai ală mpồl bơtiàn in. Bơh broă lơh do neh lơh tam gơl jơnau git wă bơh làng bol gơwèt mờ broă atbồ, sền gàr brê. Dơ̆ bàr tai là Công ty lơh jăt broă atbồ, sền gàr is gơwèt mờ mpồl lơh broă tờm sền gàr brê bơh Công ty nàng tơm priă nhai ai kuang bàng, cau lơh broă in bơh 8 tus 9 tơlăk đong tàm 1 nhai”.

Bơh tàm khà priă geh ai bè ờs bơh di pơgăp bơh 570 rơbô đong tàm 1 lồ, pah nam Công ty TNHH MTV lâm nghiệp Kon Rẫy mờ ală mpồl bơtiàn geh khà priă ring niam ai broă atbồ sền gàr brê mờ tơnguh rài kis cau lơh broă mờ brê in. Bi Lê Hữu Diễn, lơh broă tàm Phòng Kỹ thuật, Công ty TNHH MTV lâm nghiệp Kon Rẫy yal, geh 21 nam lơh broă mờ brê, să tờm bi neh gan rơlao mờ ală bơta niam, chờ, moăt bal mờ ală bă brê pà git: “Geh priă drơng ala tiah kis brê den rài kis kuang bàng, công nhân, cau lơh broă bol añ geh gơguh. Ală broă lơh geh kuang đơng lam sền gròi di pal tơl rơlao. Priă geh bơh tŭ geh broă lơh drơng ala tiah kis brê tus tŭ do di pơgăp bơh 3 tus 4 dơ̆ pơn drờm mờ lài. Bol añ gŏ iang nùs kis đềt mềr mờ broă lơh uă rơlao”.

Mùl màl broă lơh jăt broă tơm priă sền gàr tiah kis brê tàm Công ty TNHH MTV lâm nghiệp Kon Rẫy pà gŏ, do là bơta niam ngan nàng ală mpồl tờm brê tàm càr Kon Tum atbồ, sền gàr mờ tơnguh bơtàu brê niam rơlao.

Càr Kon Tum tŭ do geh bơta gơtìm bơh brê di pơgăp 63%, uă ngan tàm tiah Tây Nguyên. Ală nam do, Kes priă sền gàr mờ tơnguh bơtàu brê càr Kon Tum neh lơh jăt broă jào ù, jào brê mờ tơm priă sền gàr tiah kis brê ai làng bol kis tàm càr in. Kơnờm mờ hơ̆, nùs nhơm git wă tàm broă sền gàr brê bơh làng bol geh gơguh, tơmù broă mus kơl chi brê, pơgồp bal tàm broă lơh gơmù rơƀah, tàm hơ̆ uă ngan là tàm tiah làng bol kòn cau. Ồng Hồ Thanh Hoàng, Kuang atbồ Kes priă sền gàr mờ tơnguh bơtàu brê càr Kon Tum pà git: gùt càr geh rơlao 3 rơbô 400 hìu mờ 49 mpồl tus bal dờp atbồ, sền gàr di pơgăp 384 rơbô lồ brê, geh 67% bă ù geh brê tàm càr Kon Tum dê. Tus tŭ do, Kes priă do neh tơm rơlao 26 tơmàn đong ai ală cau bal mờ mpồl cau là cau tờm brê in; mờr 100 tơmàn đong ai ală mpồl dờp sền gàr geh ală công ty, Uỷ ban Nhân dân xã tơm priă. “Tàm ală nhai gam tai bơh nam 2021 do, Kes priă sền gàr mờ tơnguh bơtàu brê cà5r geh tơrgùm lơh jăt ờ uă tơngu me broă lơh tờm. Lài ngan là pơn jăt tai càn ing lài priă sền gàr tiah kis brê nam 2021 ai ală cau tờm brê là mpồl cau, ală UBND xã, thị trấn in. Pơn jăt tai tam gơl priă dong kờl lơh gùng dà broă atbồ brê kơl jăp ai ală mpồl cau tờm brê càr jăt mờ Kơrnoăt sồ 1054 ngai 27 nhai 10 nam 2020 bơh UBND càr dê. Di lah kòp Covid-19 geh sền gròi, geh bơyai lơh pơrjum cri bơyai tơn jơh 10 nam lơh jăt broă tơm priă sền gàr tiah kis brê, tam brê ala tàm càr; pơgồp bal mờ broă tơnkah 10 nam ngai crơng gơs Kes priă sền gàr mờ tơnguh bơtàu brê càr”.

Cau mblàng Ndong Brawl