VOV4.K’ho- Ngai 24/6, tàm Hìu lơh broă Chính phủ, Phó Thủ tướng Thường trực Chính phủ ồng Trương Hòa Bình, Kuang atbồ Mpồl đơng lam dà lơgar Broă lơh jơnau kờñ dà lơgar bơtàu tơnguh lơh sa- mpồl bơtiàn tiah làng bol jơi bơtiàn kòn cau dùl êt nă cau mờ tiah kơh bơnơm tơngai bơh nam 2021 tus nam 2030, đơng lam dơ̆ pơrjum bơh Mpồl đơng lam dê.

                  Phó Thủ tướng Thường trực Chính phủ ồng Trương Hòa Bình đơs đơng lam pơrjum

Đơs pơn dut dơ̆ lơh broă, Phó Thủ tướng Thường trực ồng Trương Hòa Bình đơs nền, pơn jat tai tơnguh bơta brồ guh is, lơh ngan bơtàu tơnguh bơh làng bol ală jơi bơtiàn kòn cau dùl êt nă cau dê, lơh gơlik ală srơh tàm pơrlòng duh hồl. Ală mpồl, gah broă lơh lơh broă bal jơh nùs nàng broă lơh do ngan ngồn geh cồng nha, rài kis làng bol jơi bơtiàn kòn cau dùl êt nă cau mờ tiah kơh bơnơm ngai sơlơ geh bơtaù tơnguh.

Jat Phó Thủ tướng Thường trực Chính phủ ồng Trương Hòa Bình đơs, tàm tŭ tơngai kòp Covid-19 pơn jat tai gơ rềng uă ngan tus tơl gah bơh rài kis lơh sa- mpồl bơtiàn dê, broă lơh do tă pơgồp dùl bơta kuơ dờng màng ngan, ờ mìng pơgồp bơnah tơnguh broă lơh gơlik mờ jơnau kờñ, ai geh broă lơh, bơtàu tơnguh lơh sa, kă bro mờ gam geh bơta kuơ dờng màng bè lơngap lơngai rài kis mpồl bơtiàn, kuơmàng là gơ wèt mờ ală cau ờ pràn, ală hìu bơnhă rƀah, hìu bơnhă geh rài kis kal ke tàm ală tiah sar lơgar ngài.

Cau mblàng K’Duẩn