VOV4.K’ho- Tàm Hà Nội, Tổng Liên đoàn Lao động Việt Nam pa bơyai lơh tơnkah 135 nam ngai Dunia Lơh broă (01/5/1886 – 01/5/2021), lam lơh Nhai Công nhân. Tus bal mờ geh jơnau đơs tàm pơrjum, Chủ tịch lơgar ồng Nguyễn Xuân Phúc đơs loh, tàm broă tơnguh bơtàu bơh kăc màng Đảng, Dà lơgar bal mờ làng bol he sùm ai broă sền gròi, drơng gàr kuơ màng tus mờ rơnàng công nhân, cau lơh broă mờ mpồl công đoàn. Kuơ màng là tơnơ̆ mờ 30 nam tam gơl pa công nhân mờ cau lơh broă gam geh măt tàm jơh ală gah broă lơh, ală bơnah broă lơh sa, ală mpồl làm lài tàm broă lơh sa mờ măi mŏk, bơ̆t bơtàu pa dà lơgar mờ lơh jăt nùs nhơm kơ̆p kờñ dà lơgar dê. Chủ tịch lơgar pơn jờng ală cấp công đoàn neh lơh jăt nền nòn jơnau đơng lam bơh Ban Bí thư sùm lơh ngan, bơceh lơh jăt ală broă lơh geh kuơ nàng mờr 10 nam do Nhai công nhân mùl màl gơs ală ngai chờ bơh công nhân, viên chức, cau lơh broă gùt lơgar dê. Chủ tịch lơgar đơs niam ală broă bơceh lơh bơh đoàn viên, cau lơh broă gùt lơgar tài bơta dờng pràn bơh mpồl lơh sa kă bro bơh anih lơh broă, mpồl lơh broă mờ broă tơnguh bơtàu bơh dà lơgar dê. Mờ sồr Mpồl công đoàn pal gờñ bơ̆t bơtàu broă lơh bơh Công đoàn Việt Nam lơh jăt Nghị quyết pơrjum dờng dơ̆ 13 bơh Đảng gàr niam khoa học mùl màl, geh cồng nha.

Tơngkah 135 nam Ngai Dunia lơh broă ngai 1/5 mờ lam lơh Nhai công nhân

Tàm dơ̆ bơyai lơh, ala mat Mpồl đơng lam Nhai lơh broă bè ờdo ờdă, kloh niam lơh broă dà lơgar, Bộ trưởng Bộ Lao động, Thương binh mờ Xã hội ồng Đào Ngọc Dung neh lam lơh Nhai lơh broă bè ờdo ờdă, kloh niam lơh broă nam 2021 mờ tơngume “Sơlơ sền sơ wì, sền gròi ală jơnau pơhìn, bơta aniai bè ờdo ờdă, kloh niam lơh broă mờ tus bal bơh cau lơh broă gàr ờdo ờdă, kloh niam dê”. Lam lơh Nhai lơh broă bè ờdo ờdă kloh niam lơh broă nam 2021, Tổng Liên đoàn Lao động Việt Nam đơng lam ală kấp công đoàn sơlơ yal tơnggit, mblàng yal; lam lơh ală srơh tàm pơrlòng mờ tơnguh cồng nha srơh làng bol lơh broă lơh ờdo ờdă kloh niam lơh broă gơ jat bal mờ broă lơh rơcang sơndră kòp Covid-19. Bơdìh hơ̆ tai, chồl pràn broă bơtàu tơnguh bè khà, tơnguh bơta niam mờ cồng nha lơh broă bơh mpồl cau gàr ờdo ờdă kloh niam dê tàm ală anih lơh sa; pà khà jờng di tŭ ai đoàn viên, cau lơh broă geh ală jơnau bơceh pa, broă lơh tam gơl kỹ thuật, tam gơl anih lơh broă, tơnguh cồng nha lơh broă mờ gàr ờdo ờdă kloh niam lơh broă; Sơlơ tơnguh ală broă lơh pơgồp bal tàm lùp sền, sền sơwì, sền gròi ờdo ờdă kloh niam lơh broă.

Cau mblàng Ndong Brawl mờ K’Duẩn