VOV4.K’ho- Pơgap mờ do 60 nam, Kon Tum là càr sơnrờp ling klàng lơgar Mỹ rơsìh dà sơnơm khih dioxin. Rài tam lơh neh lòt gan jŏ tàm ù tiah do dê, tŭ do geh pơgap 8 rơbô nă  cau gơtìp aniai tài bơh sơnơm khih hoá học. Tàm hơ̆ geh mờr 900 nă cau gam dờp geh broă lơh dong kờl cau gơtìp aniai tài bơh sơnơm khih dioxin, mờr 550 nă cau là rơnàng dơ̆ 2, dơ̆ 3 gơtìp aniai mờ geh bơta kuĕt kơlte bơh tàm tŭ deh pal dờp geh priă jền dong kờl pah nhai. Tàm ală nam do, nàng tơrmù ƀà bơta jê sồt tài bơh sơnơm khih dioxin dê lơh aniai tàm tiah sơnrờp kong mờ bơta rềs àr sơnơm khih dioxin, Đảng, Dà lơgar, gơnoar atbồ, ală Mpồl, mpồl cau, cau geh nùs nhơm niam neh geh uă broă lơh ngan ngồn nàng dong kờl jơh bal bè nùs nhơm mờ phan bơna nàng ală cau geh cèng bơta jê sồt tài bơh sơnơm khih dioxin in brồ guh tàm rài kis.

Tàm trồ mìu dờng, tàm hìu ơm Nùs nhơm tàm thị trấn Sa Thầy, kơnhoàl Sa Thầy, càr Kon Tum, cau ling yau mò Y Blỷ, 71 sơnam, cau sền gŏ rơndeh par ling klàng Mỹ dê rơsìh sơnơm khih hóa học pà gĭt: Tơnơ̆ uă dơ̆ gơtìp rơsìh sơnơm khih, ală dòr bơnơm jat kềng gah gùng rơndeh dờng 14, den ù tiah tàm ală xã: Rờ Kơi, Sa Nhơn, Hơ Moong… chi che chơ̆t gơrung jơh nha tus tŭ do. Să tờm mò tŭ hơ̆ ờ thàn jòi tiah ơm ndơ̆p, gơtìp dà sơnơm khih dà kò pơr kuh bè dà piang lơh sù bồ den gơbàn kòp jê pơn jat sùm gĭt nđờ jơ̆t nam do. Bơ klau là cau ling chơ̆t màng, să jan kòp tê jê să tài bơh rài tam lơh gơ lời wơl, bơta lơh mò Y Blỷ ờ dơr cul nùs hơ̆ ngan là bơta sền gròi, dong kờl ròng siam bơh Đảng, Dà lơgar, gơnoar atbồ, ală Mpồl, Mpồl cau bal bơh kơnhoàl tus tàm càr dê. Tŭ do, pah nhai mò Y Blỷ dờp geh priă dong kờl rlau 2 tơlak đong. Mò kung pà geh Hìu nùs nhơm dong rài kis sơlơ kŏ kơljap rlau. Tàm hìu ram mhŭ, cau ling yau Y Blỷ đơs bè do:

Ưn ngài Đảng, dà lơgar. Añ ờ geh Đảng, Dà lơgar den añ neh chơ̆t bơh jŏ bloh. Kơnhoàl kung sền gròi ngan sơl. Bí thư, Phó Chủ tịch kơnhoàl khi tus còp sùm sơl. Làng bol tàm ƀòn, ală ƀòn ndai kung kal ke ngan sơl, mìng Dà lơgar sền gròi bè hơ̆ den he kung sền gŏ geh bơta lơi mờ pal dan tai bơta do bơta ne taih.

Cau ling yau Y Blỷ sơr lèt gan bơta jê sồt tài bơh sơnơm khih dioxin lơh aniai

Kơnhoàl Sa Thầy, càr Kon Tum tŭ do geh 31 nă cau gơtìp aniai tài bơh sơnơm khih dioxin gam dờp geh bơta dong kờl bơh dà lơgar dê. Tàm hơ̆, 17 nă cau neh tus bal tam lơh gơtìp aniai tài sơnơm khih dioxin, gam wơl 14 nă cau là kòn deh bơh ală cau tus bal tam lơh dê. Ông Lê Văn Phúc, Phó Kuang atbồ Phòng Lao động, Thương binh mờ Xã hội kơnhoàl dê pà gĭt,  bal mờ lơh jat tơl làm, di tŭ broă lơh dong kờl gơwèt mờ cau gơtìp aniai tài bơh sơnơm khih hoá học, mpồl kung neh geh uă broă lơh dong kờl ală hìu bơnhă in bơtàu tơnguh lơh sa, tơnguh uă bơta niam tàm rài kis. Ông Lê Văn Phúc đơs:

Phòng neh cribơyai bal mờ UBND kơnhoàl lam lơh dùl ròt bal ală broă lơh dong kờl, ngan là broă lơh càn priă bơh gah Ngân hàng Chính sách Xã hội nàng tơrmù ƀà ală bơta kal ke tàm broă bơtàu tơnguh lơh sa. Bơh lơh jat broă lơh càn priă mờ lơh jat dùl ròt bal ală broă lơh bè hìu ơm, gah lơh sơnơm, sền bal tus tŭ do 17 nă cau tus bal tơn tam lơh gơtìp aniai tài bơh sơnơm khih hóa học neh geh rài kis bè ờs, geh hìu ơm kơ̆ kơljap, ờ geh cau lơi ơm hìu sềt, mìu nhat, ờ diơng tai.

Lùp còp, pơndờm pơnđiang hìu bơnhă cau gơtìp aniai tài bơh sơnơm khih dioxin lơh ania tàm ƀòn dờng Kon Tum

Cau ling yau Nguyễn Thanh Bình, hìu ơm tàm thôn 2, thị trấn Sa Thầy, kơnhoàl Sa Thầy đơs ngan, bơta sền gròi bơh Đảng, Dà lơgar, bơh gơnoar atbồ, ală mpồl mờ mpồl cau ală kấp dê neh dong ală cau gơtìp aniai tài bơh sơnơm khih dioxin bè ồng dê tơrmù ƀà bơta jê sồt nàng brồ guh tàm rài kis.

Broă lơh bơh Dà lơgar dê dong kờl gơwèt mờ ală cau geh màng mờ dà lơgar, cau ling kòp să, cau ling kòp tê jê să să, cau gơtìp aniai tài bơh dà sơnơm khih hóa học là uă ngan. Dong kờl bè bơto bơtê, bè ù ơm, tam gơl niam rài kis den hơ̆ sồng hìu ơm. Ală broă lơh Bảo hiểm y tế, den dong kờl priă jền pah nhai, uă ngan broă lơh den lơh geh cồng nha  uă ngan. Wa geh 3 nă kòn den tŭ do ală sau lòt bơsram geh Dà lơgar dong kờl tàm broă pơrlòng mut bơsram Đại học den tàm tŭ bơsram sră geh ờ sa priă jơh, dong kờl uă ngan ai ală sau in ntào dờng.

Bơta chờ hờp bơh cau ling yau gơtìp sơnơm khih dioxin lơh aniai Lê Hồng Chấm ơm tàm kơnhoàl Đăk Tô mờ plai chi tàm suơn he dê

Mờ uă ngan broă lơh geh ngan, geh cồng nha, tàm ală nam do Kes priă tài bơh cau gơtìp aniai tài bơh sơnơm khih dioxin càr Kon Tum dê neh dờp geh rlau 2 rơbô 500 nă cau dùl nă să is, mpồl cau tă pơgồp dong kờl mờ kờp jơh khà priă rlau 9 tơmàn đong. Bơh khà priă do, Mpồl cau gơtìp aniai tài bơh sơnơm khih dioxin ală kấp bơh càr Kon Tum dê neh di tŭ lùp còp, pơndờm pơnđiang cau gơtìp aniai mờ hìu bơnhă cau gơtìp aniai tài bơh sơnơm khih dioxin. Mò Nguyễn Thị Bình, Phó Chủ tịch Mpồl cau gơtìp aniai tài bơh sơnơm khih dioxin càr Kon Tum pà gĭt:

Bol añ kung là cau tàm tơrbŏ bal đah ală anih lơh broă, mpồl lơh sa kă bro, ală cau geh nùs nhơm niam tus mờ ală cau gơtìp aniai tài bơh sơnơm khih dioxin mờ ală broă lơh ngan ngồn, bè là lùp còp, pơndờm pơnđiang ală cau gơtìp aniai tài bơh sơnơm khih dioxin. Bơdìh mờ ală broă lơh ndai bè dong kờl hìu ơm gơwèt mờ ală cau gơtìp aniai tài bơh sơnơm khih dioxin geh rài kis kal ke bè hìu ơm. Dong kờl ală khà priă ai càn ờ kờp priă cồng nàng bơtàu tơnguh lơh sa ai ală cau gơtìp aniai geh rài kis kal ke in. Hơ̆ là ală broă lơh mờ bol añ đơs niam ngan mờ geh kuơ ngan gơwèt mờ cau gơtìp aniai tài bơh sơnơm khih dioxin.

Tàm càr Kon Tum, ngai sơlơ geh uă tai hìu bơnhă gơtìp aniai tài bơh sơnơm khih dioxin brồ guh tàm broă lơh sa, jai pha mờ bơta kòp jê, jơgloh rƀah. Pơn rơ bè hìu bơnhă ồng Lê Hồng Chấm, xã Diên Bình, kơnhoàl Đăk Tô; mò Trần Thị Cảnh, xã Sa Nghĩa, kơnhoàl Sa Thầy; ồng A Đầng, xã Đắk Tơ Lung, kơnhoàl Kon Rẫy; ồng Lý Quang Sận, ồng Trịnh Quang Thạo, xã Đắk Blà, ƀòn dờng Kon Tum... Ngai 10/8 nam do, di dơ̆ tơngkah 60 nam Ngai tài bơh cau gơtìp aniai sơnơm khih dioxin Việt Nam, 41 nă cau mờ hìu bơnhă cau gơtìp aniai tài bơh sơnơm khih dioxin tàm càr Kon Tum geh UBND càr pà Bằng khen tài bơh neh sơr lèt gan bơta kal ke, brồ guh tàm rài kis. Do là bơta cih dờp, pơndờm pơn điang, pơn jờng di tŭ ală cau dùl nă să is mờ hìu bơnhă neh sơr lèt gan bơta jê sồt tài bơh sơnơm khih dioxin.

Cau cih Khoa Điềm- Cau mblàng K’Hạnh