VOV4.K’ho- Tài gơ rềng bơh kòp Covid-19, uă mpồl lơh sa kă bro, hìu bơnhă lơh sa kă bro tàm càr Dăk Lăk pal kong mờ dùl ròt ală kal ke. Broă lơh sa, kă bro bơh uă kong ti, mpồl lơh sa kă bro dê gơtìp lơyài, ơm ing, hoàc huơr. Ngân hàng Nông nghiệp mờ Phát triển Nông thôn càr Dăk Lăk (Agribank Dăk Lăk) là dùl tàm ală ngân hàng neh lam lơh broă tơn jŏ tơngai tơm dồs, tơrmù priă cồng ai càn dong cau càn tơrmù ƀà kal ke. Bulah bè hơ̆, Ngân hàng dà lơgar pal tam gơl thông tư sồ 3 tơlik nam 2021 nàng cau càn priă in geh tai bơta kờñ bơtàu tơnguh wơl mờ bơtàu tơnguh lơh sa.

Hìu bơnhă mò Nguyễn Thị Phơn, ơm tàm mpồl 3, thị trấn Buôn Trấp, kơnhoàl Krông Ana geh 3 lồ ù tam tiêu, kơphe, sầu riêng mờ 13 lồ ù sre lơh kòi. Mờ 13 lồ ù sre, ală nam rềp ndo, mò Phơn mìng sih tam dùl kàl, kàl gam wơl mò tam bùm lô Nhờk. Mờ broă lơh do, cồng nha lơh sa gơguh uă rlau 2 dơ̆ pơndrờm mờ lơh 2 kàl kòi bè lài do. Tŭ do, mò Phơn gam dồr Ngân hàng Nông nghiệp mờ Phát triển Nông thôn 2 tơmàn đông, khà priă do uă ngan geh ngui nàng blơi sơntìl mờ phơng ơn chi tam in. Nam do, khà priă phan bơna, phơng sih gơguh jơnhua, geh bơta phơng bè đạm urê neh gơguh rlau 2 dơ̆ pơndrờm mờ nam lài. Mơya phan lơh gơs bơh suơn sre den gơmù khà priă tăc mờ ờ gơtùi tac. Mò Phơn pà git, hìu bơnhă kung neh geh ngân hàng yal tơrmù 10% priă cồng ai càn tài gơ rềng bơh kòp Covid-19. Jat mò Phơn đơs, lơh sa suơn sre jat broă lơh gơlik phan bơna kă bro tàm tơngai tŭ do kal ke ngan: “Ơpah cau lơh broă là ờ gơtùi tơrgùm gal cau. Mờ tŭ do den suơn sre hìu bơnhă añ dê kung lơh uă. Uă tŭ pal ơpah cau lơh broă bơh 30 tus 40 nă cau dùl dơ̆ lĕ bal. Kòp bơtờp bè do kung lơh gơbàn kal ke tài cau lơh broă tŭ lòt lơh broă den ờ geh tơrgùm gal cau, tài ngòt kòp bơtờp”.

Ală mpồl lơh sa kă bro di mơ mờ dềt tàm Dăk Lăk gam gơtìp kal ke tàm broă lơh sa kă bro tài bơh kòp Covid-19

Tơngai lài tàm kơnhoàl Krông Ana, càr Dăk Lăk sùm lơh jat ơm yah ngài mpồl bơtiàn jat jơnau sồr sồ 15. Ală hìu bơnhă kă bro, mpồl lơh gơlik phan pal ơm ing, cau lơh broă den ờ geh broă lơh. Uă hìu bơnhă pal àñ ơnòngt ai bơta kơn jơ̆ kơlôi rơcang oh kòn lòt lơh broă bơh tiah ndai tơrgùm rê nàng pleh kòp. Mơya 60 nă cau lơh broă bơh Kong ti TNHH lơh sa broă drơng ala Nam Hà, xã Ea Bông, kơnhoàl Krông Ana kung gam geh broă lơh. Ồng Trần Văn Thương, Kuang atbồ kong ti pà git, priă nhai bơh tơl nă cau lơh broă dê kung gam geh bơh 10 tus 11 tơlak đông pah nhai. Mơya tàm nhai 8 pa do, tài ală broă lơh bơt bơtàu gơtìp ơm ing den tàng Kong ti Nam Hà jơngkah wơl rlau 1 tơlak 500 rbô nai gac. Kal ke, priă dồs neh mpờl gŏ ngan tềng đap mat. Gàr bè ờs broă lơh sa mờ gàr tơl priă nhai di tŭ ai cau lơh broă in tàm tơngai do là bơta kal ke ngan: “Añ càn ngân hàng mờ khà priă kung uă ngan. Ngân hàng geh broă dong kờl, neh tơrmù mpồl lơh sa kă bro in dùl bơnah priă cồng. Mơya tŭ do mpồl lơh sa kă bro kung kal ke tai bè bơta lơh broă, den ngân hàng sền sơ wì tai gơtùi tơn jŏ tơngai tơm dồs, halà tơrmù ƀà dùl êt priă cồng ai mpồl lơh sa kă bro in nàng mpồl lơh sa kă bro pơn jat tai gàr broă lơh ai oh mi cau lơh broă in”.

Git nđờ rbô nă cau càn priă ngân hàng gơtìp gơ rềng tài bơh kòp Covid-19 tàm Dăk Lăk gam sền sơ wì tơrmù priă cồng ai càn

Kong ti TNHH bơcri priă kă bro Thông Phát bơh ùr bơklau ồng Đinh Văn Kháng dê geh dùl hìu nac tàm bă tiah kuơmàng tàm gùng Hùng Vương, ƀòn dờng Buôn Ma Thuột. Lài do nac bơh làm gùt ală tiah tus gal ngan. Mơya nđờ nhai do, hìu nac mìng gàr 2, 3 nă cau lơh broă gròi sền mpồng mut. Ồng Kháng đơs niam ngan broă lơh tơrmù priă cồng bơh sơnĕ Ngân hàng Nông nghiệp mờ Phát triển Nông thôn tàm Hoà Thắng dê, tiah mờ ồng gam dồs 6 tơmàn đông: “Bơh tŭ geh kòp den gơ wèt mờ mpồl lơh sa kă bro gah hìu nac den khà nac bơh ală càr ờ huan geh, den tàng broă kă bro kal ke ngan tài khà nac tus ndrờm bè ờ geh tơn. Đah ngân hàng neh geh bơta dong kờl niam ngan. Den ngân hàng geh jơnau yal ai mpồl lơh sa kă bro in là geh tơrmù priă cồng 10% tàm kờp jơh khà priă càn”.

Ờ mìng mpồl lơh sa kă bro, ală hìu bơnhă ròng phan, tam phan tàm Dăk Lăk kung gơtìp kal ke tài bơh kòp Covid-19 kờñ geh dong kờl tơrmù priă cồng ai càn bơh ngân hàng

Ồng Vương Hồng Lĩnh, Kuang atbồ Ngân hàng Nông nghiệp mờ Phát triển Nông thôn sơnĕ càr Dăk Lăk pà git, tŭ do, ngân hàng neh tam gơl priă cồng ai rlau 50 rbô nă cau càn in mờ khà dồs ai càn 12 rbô 400 tơmàn đông, tơrmù 10% priă ai càn tàm jơh ală sră pơrgon. Bơdìh hơ̆ tai, ngân hàng gam tă 30 rbô tơmàn đông priă ai càn ai ală cau càn là mpồl lơh sa kă bro di mơ mờ dềt in mờ priă cồng ai càn 7% tàm dùl nam. Tơngai lài, broă lơh gàr tơl niam rài kis mpồl bơtiàn kung sùm geh ngân hàng lam lơh ngan ngồn, neh dong kờl gơnoar atbồ rlau 5 tơmàn 400 tơlak đông, tàm hơ̆ dong kờl hìu sơnơm dờng ƀòn dờng Buôn Ma Thuột 1 nơm rơndeh sơnơm, mờ ală phan bơna, măi mok lơh sơnơm kờp priă 2 tơmàn 950 tơlak đông. Nàng dong cau càn geh dờp bơta dong kờl dùl bă loh làng cèng wơl cồng nha ngan ngồn, ồng Vương Hồng Lĩnh dan: “Tàm tŭ lam lơh broă dong kờl cau càn den Agribank sơnĕ Dăk Lăk neh geh 2, 3 bơta kòl yan, hơ̆ là: đal git khà cau nac gơtìp gơ rềng tài bơh kòp Covid-19 nàng bơh hơ̆ tơrmù priă cồng ai càn, gàr bè ờs mpồl dồs ai cau nac in den gam kwi kuơ, ờ geh bơnàng jă nàng gơ in dipal. Dơ̆ 2, dồs neh rlau tơngai hơ pơrgon tơm bơh Agribank sơnĕ Dăk Lăk dê digơlan gam pơn jat tai gơguh uă, tài bơta pràn bơh cau càn dê gơtìp gơ rềng tài bơh kòp Covid-19. Jơnau dan bơh Agribank sơnĕ Dăk Lăk dê là: Ngân hàng dà lơgar sền sơ wì tơn jŏ tơngai rơndap tap sèng tơm dồs ai cau càn in nàng tă bơsong kòl yan ai cau càn priă in tơm dồs ờ huan kal ke rlau, dùl bă ƀuơn rlau, dơ̆ 2 tai là sền sơ wì, tam gơl thông tư sồ 3 nam 2021 bơh Ngân hàng dà lơgar dê bè sền sơ wì ală bơnah priă tă tơnơ̆ ngai 10/6/20220 ai cau càn in, nàng cau càn geh tai bơta kờñ bơtàu tơnguh wơl broă lơh sa, kă bro geh cồng nha rlau.

Cau mblàng K’Duẩn