VOV4.K’ho- Jơnau tơngĭt nggùl ngai òr (11/05) bơh Bộ Y tế pà gĭt neh geh tai 18 nă cau gơtìp mờ kòp Covid-19, tàm hơ̆ geh 2 nă cau mŭt bơh lơgar bơdìh neh gơtìp tam cah is tơn, 16 nă cau geh dờp tàm lơgar ndrờm là ală cau tàm tiah tam cah is, tiah geh kơrian.

2 nă cau geh tam cah is tơn tŭ mŭt tus càr Đồng Nai. 16 nă cau gơtìp geh dờp tàm lơgar, tàm hơ̆ geh 10 nă cau tàm càr Bắc Giang, 2 nă cau tàm Hà Nội, 2 nă cau tàm càr Quảng trị, 1 nă cau tàm càr Bắc Ninh mờ 1 nă cau tàm càr Hải Dương. Kờp tus 12 jơ ngai òr (11/05), lơgar Việt Nam kờp jơh geh 2 rơbô 71 nă cau geh dờp gơtìp kòp tàm lơgar mờ 1 rơbô 436 nă cau mŭt bơh lơgar bơdìh. Khà cau gơtìp kòp pa kờp bơh ngai 27 nhai 4 tus tŭ do là 501 nă.

Bộ trưởng Bộ Y tế ồng Nguyễn Thanh Long yal, tàm bơta kòp Covid-19 tŭ do, pal sền broă xét nghiệm là dùl tàm ală kơnòl tờm, geh kuơ, mhar lơh jăt. Bộ trưởng pà gĭt, he geh tàm bơta yal lài uă tài bơta di gơlan gơtìp mờ kòp mờ lơh gơtờp bơh virus pràn.

Cau mblàng Ndong Brawl