VOV4.K’ho- Di tơngkah 96 nam Ngai Sră ƀăo kac màng Việt Nam (21/6), uă mpồl cau ala mat Bộ, mpồl lơh broă, gah broă lơh dà lơgar mờ ală tiah neh tus nting bơr gờm chờ kuang đơng lam bồ, kuang bàng, cau cih ƀău, cau cih gơs jơnau đơs, kỹ thuật viên bơh Anih jơnau đơs Việt Nam (VOV) dê. Lòt còp mờ nting bơr gờm chờ Anih jơnau đơs Việt Nam, Bộ trưởng, Chủ nhiệm Ủy ban Dân tộc ồng Hầu A Lềnh kơp kờñ, kuang đơng lam bồ Anih jơnau đơs Việt Nam mờ kuang bàng, cau cih ƀău, cau cih gơs jơnau đơs bơh Anih jơnau đơs Việt Nam dê pơn jat tai pơgồp bal, dong kờl yal tơnggit, mblàng yal ală gùng dà, broă lơh tus làng bol ală jơi bơtiàn kòn cau tàm tơngai tus.

Bộ trưởng Bộ Thông tin mờ Truyền thông ồng Nguyễn Mạnh Hùng lòt còp mờ nting bơr gờm chờ VOV den đơs là, sră ƀău gam pal tàm pơrlòng mờ mạng xã hội; sồr pal tam gơl pa broă lơh. Bộ trưởng Nguyễn Mạnh Hùng pà git, Bộ Thông tin mờ Truyền thông geh bơsong ală broă bè thể chế, broă lơh nàng lơh gơlik bơta ƀuơn ai sră ƀău in bơtàu tơnguh. Kung tàm ngai 17/6, uă mpồl cau ala mat ală Bộ, mpồl lơh broă, gah broă lơh, anih lơh broă, mpồl cau bơh dà lơgar dê mờ ală càr, ƀòn dờng kung neh lòt nting bơr gờm chờ Anih jơnau đơs Việt Nam bè: Bộ Kuang àng, Tổng Liên đoàn Lao động Việt Nam, Bộ Ngoại giao, Ủy ban Nhân dân càr Hải Dương...

Cau mblàng K’Duẩn