VOV4.K’ho- Jơnau tơngĭt ngai òr bơh Bộ Y tế pà gĭt neh geh tai 68 nă cau gơtìp kòp Covid-19 tàm lơgar, mìng is càr Bắc Giang geh 48 nă, càr Bắc Ninh 4 nă, ƀòn dờng Hà Nội 12 nă, càr Long An 2 nă, càr Dak Lak 1 nă mờ ƀòn dờng Đà Nẵng 1 nă.

Kung tàm drim òr (31/05), hìu sơnơm Dà lơgar Huế neh bơyai lơh ai mpồl cau lơh sơnơm tus dong kờl càr Bắc Giang tam dră mờ kòp Covid-19. Mpồl do geh 18 nă kuang bàng, cau lơh sơnơm là ală cau jăk chài gơwèt ală gah hồi sức tích cực, hồi sức plai nùs gùng mhàm, tam dră mờ khih.

Bơdìh mờ broă tus bal sơm kòp, rơwah, jòi tềl cau neh tìp... ală cau jăk chài bơh hìu sơnơm Dà lơgar Huế geh yal ờ uă jơnau yal khoa học nàng tam pà bal ală jơnau ngăc ngar mờ broă lơh mờng chài lơh jăt broă sền gàr mờ sơm kòp cau kòp Covid-19. Lài mờ hơ̆, UBND ƀòn dờng Đà Nẵng kung neh ai 10 nă bác sĩ, điều dưỡng lòt gùng dong kờl càr Bắc Giang tàm broă sơm kòp, sơndră tam dră mờ kòp Covid-19. Thứ trưởng Bộ Y tế ồng Nguyễn Trường Sơn pà gĭt, Bộ tŭ lơi kung rơcang ai 500 nă cau bơsram dờng bơh hìu bơsram Cao đẳng Y tế Bạch Mai mờ rơlao 400 nă cau lơh sơnơm ndai nàng dong kờl càr Bắc Giang.

Cau mblàng Ndong Brawl