VOV4.K’ho- Mpồl lơh broă bơh Ủy ban Mặt trận dà lơgar Việt Nam dê bơh ồng Phùng Khánh Tài, Phó Chủ tịch Ủy ban Mặt trận dà lơgar Việt Nam lơh kuang ătbồ mpồl pa geh dơ̆ lơh broă mờ càr Lâm Đồng bè broă lòt sền, gròi sền broă lơh tĕ khà Kuang bàng Quốc hội khoá XV mờ Kuang bàng Hội đồng Nhân dân ală kấp tơngai lơh broă bơh nam 2021- 2026.

Sền bal, broă lơh rơcăng tĕ khà tàm Lâm Đồng bơh kấp càr tus kấp kơnhoàl mờ kấp xã neh geh lơh jăt di tơngai jăt jơnau sồr. Tỉnh ủy, Hội đồng Nhân dân, Ủy ban Nhân dân, Ủy ban Tĕ khà càr neh rơcăng lài bơyai lơh, lam lơh jăt ală kơnòl broă lơh broă tĕ khà, kơlôi sơnơng ală bơta pa pơndrờm mờ tơngai lơh broă bơh nam 2016- 2021 nàng lam lơh jăt di tơngai mờ tŭ jiơ sồr, ngan là kờp sền wơl ală tơngume tàm tiah he dê nàng pleh gơtìp rơmơ̆p ndơl.

Phó Chủ tịch Ủy ban Mặt trận dà lơgar Việt Nam ồng Phùng Khánh Tài cih dờp, jờng rơ ngan broă lơh rơcăng tĕ khà bơh càr Lâm Đồng dê. Tỉnh ủy, Hội đồng Nhân dân mờ Ủy ban tĕ khà càr dê bal mờ ală anih lơh broă mặt trận dà lơgar ală kấp neh sồr lơh, geh ală sră nggal, broă rơndăp lơh di tŭ, bơyai lơh ală pơrjum cribơyai di tơngai, di bơnah, lơh geh jơnau sồr neh ai tơlik. Lâm Đồng pal pơn jăt tai đòm jăt ală cồng nha neh lơh geh, lơh jăt di tơngai mờ di tŭ jơh ală broă lơh pơn jăt tai nàng broă lơh tĕ khà tàm tiah he dê lơh geh cồng nha niam ngan rlau jơh.

Cau mblàng Lơ Mu K’Yến