VOV4.K’ho- Ngai 22/03, Mpồl lơh broă bơh Ban Thường trực Ủy ban Mặt trận Dà lơgar Việt Nam lơh jat broă lơh lòt sền, sền gròi broă lơh tĕ khà Kuang bàng Quốc hội khoá 15 mờ tĕ khà Kuang bàng Hội đồng Nhân dân ală kấp, tơngai lơh broă bơh nam 2021-2026 tàm càr Kon Tum. Bơh kơlôi sơnơng uă ngan sră nggal bơh Ủy ban tĕ khà càr Kon Tum dê mờ lòt sền bơta geh ngan tàm kơnhoàl Đăk Hà, Mpồl lòt sền, sền gròi sền gŏ, càr Kon Tum neh rcang lài uă ngan, lơh ngan lơh nền lam lơh ală sră nggal bè tĕ khà mờ ală sră nggal đơng lam, sồr lơh bơh càr dê; tus bal pơlam tàp tơl làm; ală mpồl drơng broă tĕ khà gàr tơl bè khà, bơnah cau, tŭ tơngai.

Ủy ban Mặt trận Dà lơgar Việt Nam sền gròi broă lơh tĕ khà tàm càr Kon Tum

Mpồl lòt sền, sền gròi bơh Ban Thường trực Ủy ban Mặt trận Dà lơgar Việt Nam tơngkah càr Kon Tum bàr pe tơngume ờ hềt di mờ jơnau sồr, gam ờ hềt tơl, bè: bàr pe nă cau tơlik mat tĕ khà kung gam geh mat tàm sră cih mat Ban tĕ khà mờ Mpồl tĕ khà; bơtơl kấp griăt tàm sră nggal ală cau tơlik mat tĕ khà ling klàng dê; broă lơh jat jơnau sồr bè sră nggal sră cih tàm dơ̆ pơrjum cribơyai.

Cau mblàng K’ Hạnh