VOV4.K’ho- Ủy ban tĕ khà càr Dak Lak bơh ồng Phạm Ngọc Nghị, Chủ tịch Ủy ban Nhân dân càr, Phó Chủ tịch Ủy ban tĕ khà càr lơh kuang atbồ mpồl neh lòt sền broă rơcang tĕ khà kuang bàng Quốc hội khóa 15 mờ kuang bàng Hội đồng Nhân dân ală kấp tơngai lơh broă bơh nam 2021 tus nam 2026 tàm thị xã Buôn Hồ. Jat jơnau yal bơh Ủy ban tĕ khà thị xã Buôn Hồ dê, broă rơcang tus dơ̆ tĕ khà neh geh thị xã đơng lam, lam lơh gàr di jơnau sồr. Ủy ban tĕ khà thị xã neh tơlik nghị quyết bè broă lơh nền mờ yal khà mpồl tĕ khà, mat ală mpồl tĕ khà mờ khà kuang bàng geh pồ tàm tơl mpồl tĕ khà Hội đồng Nhân dân thị xã, kuang bàng Hội đồng nhân dân xã, sơnah ƀòn.

Đơs pơn dut dơ̆ lơh broă, ồng Phạm Ngọc Nghị sồr broă rơcang lơh pal geh lam lơh jơh nùs, lòt sền nền nòn nàng ngai tĕ khà ngan ngồn là ngai chờ bơh jơh gùt làng bol dê. Ủy ban tĕ khà thị xã Buôn Hồ đơng lam, pơlam Ủy ban tĕ khà ală xã, sơnah ƀòn pơn jat tai tơrgùm lam lơh jat ală kơnòl broă di mờ tŭ tơngai hơ pơrgon, sùm lòt sền, kờp sền, bơt bơtàu tơl ală rơndap broă sền gàr lơngap lơngai, ờdo ờdă tus dơ̆ tĕ khà, rơcang lài sơndră tàm ală broă gơlik geh bè kòp bơtờp, trồ tiah lơh aniai.

Cau mblàng K’Duẩn