VOV4.K’ho- Drim ngai 13/7, ai jơnau đơs bè kờp dŭ ală broă rơndap lơh bơtàu tơnguh lơh sa- mpồl bơtiàn, broă rơndap lơh priă jền dà lơgar, broă rơndap lơh càn, tơm dồs dà lơgar mờ broă rơndap lơh bơcri priă dà lơgar di mơ tơngai, bơh nam 2021 tus nam 2025, Ủy ban Thường vụ Quốc hội ring bal mờ rơndap broă bơh Chính phủ dê bè gơguh tă dơ̆ ngui kes priă dà lơgar tơngai do kờp dŭ jơnhua rlau mờ tơngai lài là 3,7% GDP.

Ủy ban Thường vụ Quốc hội đơs là, tŭ do bơta geh ngan tàm dơlam is rài lơh sa dê ờ hềt pràn, gơguh lơh sa ờ hềt gàr niam kơ̆ kơljap. Gơ rềng bơh tam gơl trồ tiah, mìu càl rbut, dà hang mut aniai lơh gơbàn jơnau gơ lời wơl kơn jơ̆ kơn jut. Kuơmàng, kòp dờng Covid-19, jat jơnau đơs ờ hềt gŏ jơh kal ke, kòl yan bơh mpồl lơh sa kă bro mờ làng bol dê.

Phó Chủ tịch Quốc hội ồng Trần Thanh Mẫn sồr pal sền sơ wì uă rlau tai ală bơta ờ pràn gơ rềng tus rài priă jền dờng, ai priă mờ tă dơ̆ ngui priă jền tơngai pa do, ngan là gơ rềng bơh kòp Covid-19 dê. Kuơmàng là bơta kal ke tơm dồs dà lơgar mờ tă dơ̆ ngui kes priă. Kung tàm drim ngai 13/7, Ủy ban Thường vụ Quốc hội ai jơnau đơs bè jơnau yal tơrgùm jơnau đơs, jơnau dan bơh cau tĕ khà gùt lơgar dê pơyua tus pơrjum dơ̆ 1, Quốc hội khóa 15.

Cau mblàng K’Duẩn