VOV4.K’ho- Tàm mho ngai 27/4, bơh bơta đơng lam bơh ồng Vương Đình Huệ Chủ tịch Quốc hội dê, Ủy ban Thường vụ Quốc hội neh pờ tê ring bal jơnau dan bơh Chính phủ dê ai gơnoar ngui 12 rbô 100 tơmàn đong tềm pềr dơ̆ ngui bơh kes priă dà lơgar dê nàng blơi sơnơm vaccine rơcăng sơndră kòp Covid-19.

Broă ngui priă jền do nàng blơi sơnơm vaccine rơcăng sơndră kòp Covid-19 là kờñ ngan mờ jal mhar ngan, nàng lơh jăt broă lơh sền gàr niam ờdo ờdă rài kis mpồl bơtiàn in jăt jơnau cih tàm Adat Kes priă dà lơgar dê. Chính phủ neh kờp dŭ ală bơnah priă mờ priă dơ̆ ngui dipal đau mờ geh cơng tàng. Bulah bè hơ̆, Ủy ban Thường vụ Quốc hội kung tơngkah dong kờl ai ală tiah kal ke in tàm bơta tàm pơnring kes priă dipal mờ broă blơi mờ ngui sơnơm vaccine.

Đơs tơn jơh dơ̆ pơrjum 55, ồng Vương Đình Huệ Chủ tịch Quốc hội sồr ală anih lơh broă rơcăng lài nền nòn ală jơnau yal tàm dơ̆ pơrjum dơ̆ sơnrờp, Quốc hội khoá XV. Digơlan tàm dơ̆ pơrjum dơ̆ sơnrờp, Quốc hội khoá XV lơh broă tàm 11 ngai; mŭt pơrjum tàm ngai 20/7 mờ tơn jơh pơrjum tàm ngai 03/08. Tàm dơ̆ pơrjum do, Quốc hội geh lời uă tŭ jiơ sền swì, lơh nền bè broă lơh kuang bàng.

Cau mblàng Lơ Mu K’Yến