VOV4.K’ho- Pơn jat tai broă lơh pơrjum dơ̆ 6, mho ngai 09/12, Ủy ƀan Thường vụ Quốc hội ai jơnau đơs bè Rơndap broă bơt bơtàu cơ chế, broă lơh nam priă jền, priă jền nàng dong kờl lam lơh Broă lơh bơtàu tơnguh wơl mờ bơtàu tơnguh lơh sa- mpồl bơtiàn. Rơndap broă do là rơndap broă kuơmàng ngan mờ jal mhar tŭ do. 2, 3 tơngume lài do neh geh Quốc hội jàu gơnoar ai Ủy ƀan Thường vụ Quốc hội in sền sơ wì.

Dơ̆ do broă lơh bơtàu tơnguh wơl mờ bơtàu tơnguh lơh sa- mpồl bơtiàn gơ ơm bơdìh ală broă rơndap lơh 5 nam bơh nam 2021 tus nam 2025 neh geh Quốc hội ring bal bè: broă rơndap lơh bơtàu tơnguh lơh sa- mpồl bơtiàn, broă rơndap lơh priă jền kes priă, broă rơndap lơh bơcri priă dà lơgar di mơ tơngai, broă rơndap lơh càn mờ tơm priă dồs dà lơgar di mơ tơngai. Tàm tŭ tơngai kòp bơtờp gam gơlik geh kal ke, broă geh bơnah dong kờl pơn jat tai nàng bơtàu tơnguh wơl lơh sa là kuơmàng ngan. Bơnah dong kờl do geh tơrgùm tàm 2 nam. Tàm hơ̆ nam 2022, tơrgùm tàm broă bơtàu tơnguh wơl, ai nam 2023 geh tơrgùm tàm broă chul chồl gơguh lơh sa. Priă bơcri nàng lam lơh bơnah dong kờl nam priă jền mờ priă jền digơlan bơh broă càn mờ jai tơm dồs, mơya pal gàr bơta gơtùi lam lơh ngan ngồn mờ bơta gơ dờp bơh rài lơh sa dê.

Cau mblàng K’Duẩn