VOV4.K’ho- Cribơyai tàm Jơnau yal bơh Chính phủ dê bè cồng nha lơh jat tềm pềr, sơndră pơhì pơhà tàm nam 2020 tàm dơ̆ pơrjum tàm mho ngai 27/5, ală jơnau đơs tàm Ủy ban Thường vụ Quốc hội cih dờp bơta lơh ngan mờ ală cồng nha lơh geh tàm nam 2020, ngan là tàm tơngai trồ tiah mờ bơta kòp lơh aniai.

Chủ tịch Quốc hội ồng Vương Đình Huệ đơs tàm dơ̆ pơrjum

Bulah bè hơ̆, uă broă bè lơh jat ngui tềm pềr, sơndră hoàc huơr kung geh ai tơlik dùl bă song dơ pă. Ai jơnau đơs tàm tơngume do, ồng Vương Đình Huệ, Chủ tịch Quốc hội đơs nền, lơh jat tềm pềr, sơndră pơhì pơhà là gùng dà dờng ngan bơh Đảng dê, geh cih tàm adat boh lam, bal mờ sơlơ tơnguh tai tam dră rcang sơndră sa kuề sa kuà. Den tàng bè hơ̆, bol he geh bal Adat Rcang sơndră sa kuề sa kuà mờ Adat lơh jat tềm pềr, sơndră pơhì pơhà, ờ gŏ di mìng sồr tàm tiah lơh broă dà lơgar  dê lơm mờ geh bal tàm tiah lơh broă làng bol dê. Nùs nhơm sồr lơh bơh Thủ tướng Chính phủ dê là pal loh làng, song dơ pă, bơta lơi niam pal jờng rơ, ală tiah, Bộ, gah sơnah lơh broă lơi niam, broă lơh lơi niam pal geh rề ơnàng lơh uă, tiah lơi lơh tìs, ờ hềt pràn jak den pal đơs lah mờ lơh glài.

Cau mblàng K’Hạnh