VOV4.K’ho- Pơn jăt tai broă pơrjum dơ̆ 4, ngai òr (13/10), Ủy ban Thường vụ Quốc hội pơgồp jơnau đơs bè broă rơcang pơrjum dơ̆ 2, Quốc hội khoă 15; Pơgồp jơnau đơs bè rơndăp broă adăt tam gơl, bơtơl Khà măt – Khà kờñ jăt jơnau kờp dà lơgar bơh adăt Kờp sền; Sền sơwì, tơlik kơrnoăt broă bơtơl khà rơndăp broă tă, tơm priă dong kờl lơgar bơdìh nam 2021 ai càr Quảng Nam in.

Pal kah ngan, Ủy ban Thường vụ Quốc hội pơgồp jơnau đơs bè rơndăp broă ngui ù dà lơgar tơngai bơh nam 2021 tus 2030, wèt tus nam 2050 mờ rơndăp broă ngui ù 5 nam bơh nam 2021 tus 2025. Jăt gơnoar broă, Quốc hội là anih lơh broă kĭ rơndăp broă ngui ù tơngai bơh nam 2021 tus 2030, wèt tus nam 2050. Rơndăp broă ngui ù dà lơgar là rơndăp broă bơta tờm, tơl ală bơta, pal geh lơh lài, lơh tơngu me rơndăp broă gah, mpồl lơh broă, rơndăp broă kơnhoàl ù tiah mờ ală tiah in. Rơndăp broă ngui ù dà lơgar nàng sền gàr, geh sùm khà ù lơh kòi di pal nàng gàr tơl phan sa dà lơgar; ù brê rơcang gàr, ù brê hòn is nàng sền gàr tiah kis sinh thái, rơcang sơndră mờ tam gơl trồ tiah.

Cau mblàng Ndong Brawl